Чолга самырык тукымым ушышо школ
Автор — Анастасия Муравьева.
Кылме тылзын 7-8-ше кечылаштыже Удмуртий Республикысе Ижевск олаште черетан (кокымшо) Вӱдынчылык национал школ (Национальная школа лидерства) пашам ыштен. Тышке Российысе 32 регион гыч 120 наре еҥ погынен. Мари, хант, манси, эрзя, мокша, карел, вепс, саам, коми, коми-пермяк, ижор, удмурт, эстон, мордва калык гыч лекше ӱдыр-рвезе-влак лийыныт.
Школым вӱден шогышо-влак: Российысе финн-угор калыкын ассоциацийыштым вуйлатыше, Россий сенатор Пётр Тултаев, Удмуртийысе Кугыжаныш советын председательже, Российысе финн-угор калыкын ассоциацийым вуйлатышын алмаштышыже Татьяна Ишматова да Марий Элысе Кугыжаныш погынын председательже, тыгак Российысе финн-угор калык-влак ассоциацийым вуйлатышын алмаштышыже Михаил Васютин.
Тыште пленар заседаний эртен, тӱрлӧ кундемла гыч толшо-влак шочмо йылмым да тӱвырам вияҥдыме проектышт дене палдареныт. Финн-угор калык-влак ассоциацийын (АФУН-ын) самырык советшым шочыктымо да тудын ончылеҥжылан Максим Алгайкиным, марий морко рвезым, ойырымо.
Тыгак удмурт да карел куштымаш дене палыме лийынна. Бураново гыч кумдан палыме кова-влак деке унала миен коштын улына.
Тау тыгай вашлиймашлан, финн-угор калык коклаште йолташ кылым кучымаште йӧнлан! Кугешнем: шке шочмо йылме дене кутырышо, калык верч тыршыше самырык ӱдыр-рвезе-влак улыт. Йылмына вияҥын да шуаралтын шогыжо!
Авторын фотожо-влак.
