Чумбылат курыкет, ямле верет…
«Ты верыште ласкалыкым шижат, кумыл лыплана, вий ешаралтеш. Курык Кугыза дек порым йодын толат гын, чыла шукталтеш», – тыге ойлат Киров кундем Советский районышто верланыше Чумбылат курыкышто эртаралтше кугу кумалтышыш коштшо еҥ-влак.
Ты кумалтыш ий еда эн кужу кече да эн кӱчык йӱд пагытыште рушарнян эртаралтеш. Тений тудо 19 июньышто лийын.
Курык Кугызалан кумалаш тений ятырынак толыныт. Вет пытартыш кок ий жапыште тӱрлӧ чарымашлан кӧра кумалтыш-влакым эртараш лийын огыл. Тышке Марий Эл гыч веле огыл, вес кундемла гычат коштыт. Икте курык йымач йоген лекше яндар памаш вӱдым налеш, весе кугу кӱ пелен шогалын, вий-куатым йодеш, кумшо Немда эҥер серысе сылне вер-шӧрым ончен йывырта.
Кӱсотышто чылан тыматлын мутланат, порын шыргыжал колтат. Палыме але палыдыме, марий я вес калык гыч лекше – кажныже икоян, ик шӱлышан. Ик тулото воктене погынен, кугезе тукымна семынак, кумалтышыш толшо калык пӱртӱс вий деч шулыкым да порылыкым йодеш, ик ешла ик под гыч кумалме кочкышым тамла. Кумалше айдеме ӱшана: тыште налме шӱлыш мемнам, ешнам, лишыл еҥна-влакым аралаш полша, йырваш тынысым шочыкта.