Пабайнурышто — пайрем
Марий Турек Арбор кундемын шым ялже гыч иктыже – Пабайнур. Тудо Татарстанысе Балтач районын марла йоҥгышо (Кугунур Шуда) суас ялже-влак воктене верланен. Ты вершӧр мурен-кушташ йӧратыше еҥ-влак дене ожнысек торашке чапланен.
Тений 14 августышто тысе калык ял пайремым эртарен колтен. Варажым Арбор кундемын моло ялже-влакат шке кундемыштышт весела погынымашым эртарымашке ушненыт. Тӱҥалтышым лачак Пабайнур калык ыштен.
Тылеч икмыняр кече ончыч тиде ялыште кугу марий сӱан лийын. Каче ден ӱдыр сылне марий вургемышт дене пошкудо Татарстан Балтач районын загс пашаеҥже-влакым ӧрыктареныт. Самырык мужыр тыште возалтын.
Пабайнур ялын пайремже тиде куанле кечылан пӧлеклалтын манаш лиеш. Вет качымарий изирак ялнан старостыжо – Иван Федоров. Оръеҥ пошкудо Татарстан кундем Улисъял гыч – Соловьева Карина.
Самырык мужырын сурт-пече ваштарешышт сценым ыштеныт. Пабайнур калыкым Арбор клуб пашаеҥ-влак саламленыт. Калык изирак концертым шынден, ӱстелым поген, уна-влакым вашлийын. Йомакысе семын кум кече да кум кас веселан мурен-куштен.
Автор — Ална Алкече.
Авторын фотожо-влак.