Сардаялыште гӱжлен Ӱярня
Ятыр моло кундемысе семынак, Марий Турек район Сардаялыште 6 мартыште Ӱярня арням ужатеныт.
Тиде пайремым ял калык пырля эртара. Эрдене-эрак озавате-влак шке суртыштышт мелнам кӱэштыныт. Кечывал лишан кевыт тураште погыненыт. Тушто нуным олым дене ыштыме «ӱярня кува» вашлийын. Еҥ-влак икте-весыштым пура да кондымо мелна дене сийленыт, тӱрлӧ модыш дене модыныт. Кодшо ийын гын туштак мелнам кӱэштын ужаленыт улмаш…
Вара ял калык, пайремлан ямдылыме чучылым налын, гармонь сем почеш ял мучко мурен-мурен, курык деке каен. Кажныже мӧҥгыштӧ ончылгоч лапчык дене ыштен ямдылыме курчакым Ӱярня тулотыш чыкен да тыге чылан пырля йӱлалтеныт. Тулото иземмеке, изижат-кугужат тул ӱмбач кум гана тӧрштен. Умбакыже чыланат шер теммеш курыкышто мунчалтеныт.
Телым ужатыже Ӱярня, ме у шошым порын вашлийына!
Алина Ларионован фотожо.
