Теле дене чеверласеныт
Эртыше каныш кечын, 13 мартыште, Морко район Шлань ялыште телым веселан ужатеныт.
Еҥ коклаште сылне марий вургем дене «Эр кече» ансамбльын (вуйлатыше Дмитрий Терентьев) да этнотӱвыра комплексын еҥышт поснак ойыртемалтыныт.
Толшо-влак ӱярня вара да курык гыч мунчалтеныт, тӱрлӧ конкурсышто таҥасеныт: вӱд вара дене вӱдым нумалыныт, салмавондо дене салмам кучен куржталыныт, тереш еҥым шынден шупшыктеныт. Тылеч посна клубышто мураш да гармонь дене шокташ кумылан-влак таҥасеныт. Эн чолга-шамычлан пӧлекым кучыктеныт.
Каныме семын мелна да чай дене сийлалташ лийын. Мучашлан чылан рӱжге мурен-куштеныт.
Пайремым верысе администраций, Унчо ден Шлань клуб да Унчо селасе этно-тӱвыра комплекс пашаеҥ-влак эртараш полшеныт.
