Марий йӱлам шымлымаште
9-10 июньышто В.М.Васильев лӱмеш йылмым, сылнымутым да историйым шымлыше институтышто «Марий калык йӱла: историй да кызытсе пагыт» Россий кӱкшытан шанче-практик конференций эртаралтын. Тушко Марий Эл, Пошкырт, Одо, Татарстан, Мордовий, Чуваший, Свердловский, Пермь кундемла, тыгак Моско, Пенза да Самара олала гыч 90 утла еҥ погынен.
Икымше кечын уна-влак Марий Эл Республикысе кугыжаныш архивыште марий калыкын акрет вераже нерген палдарыше ончерыште лийыныт. Конференций почмаш годым МарНИИИ-н директоржо Евгений Петрович Кузьмин, Марий Эл Правительстве Председательын икымше алмаштышыже Михаил Зиновьевич Васютин,Марий Элысе тӱвыра, печать да калык-влакын пашашт шотышто министрын алмаштышыже Игорь Геннадьевич Садовин, Мер Каҥашын председательже, Оньыжа Эдуард Васильевич Александров, Марий Эл Республикысе Рӱдӧ юмыйӱла ушемын тӱҥ онаеҥже Александр Иванович Таныгин да Пошкырт кундемысе Рӱдӧ юмыйӱла ушемын тӱҥ онаеҥже Геннадий Павлович Пастиев уна-влак дене вашлийыныт, саламлымаш мутым ойленыт. Пленарный заседанийыште марий шымлыше институтын пашаеҥже-влак, историй шанче доктор Татьяна Багишевна Никитина, филологий шанче доктор Любовь Алексеевна Абукаева, тыгак Одо кундемысе шымлыше институтын пашаеҥже Надежда Ивановна Шутова марий калык йӱла нерген докладым лудыныт. А Морко район Унчо кыдалаш школын тунемшыже-влак «Ӱдыр сий» фольклор да этнографий сынан композицийым ончыктеныт. Умбакыже конференцийыш толшо-влак тӱрлӧ секцйлаште пашам ыштеныт.
Марий шымлыше институтын лаштыкыштыже конференций гыч видеом ончаш лиеш:
https://vk.com/marniiyali?z=video-177511331_456239079%2F8d4fd5bfbe6c9ea7c3%2Fpl_wall_-177511331
Кокымшо кечын конференцийыш толшо-влак Советский районысо Марий йӱла общинын эртарыме кумалтышыш миеныт, Курык Кугызалан кумалме йӱла дене палыме лийыныт.
Фото-влкым Э.Монахова, И.Степанова деч да МарНИИИ-н архивше гыч налме.