Пакчасаскалан вӱд кӱлеш, айдемылан — усталык паша
Тудын кидешыже тыглай пу комыля пайдале да мотор арверыш савырна. Тудын пашаже-влак чоным куандарат, кумылым нӧлтат. Пу – пӱртӱсын ужашыже, яндар поянлыкше. Сандене, очыни, пу дене ыштыме арвер-влак мыланна поснак келшат.
Алексей Кудрявцевын ыштыме арверже-влакым ужмеке, кеч иктаж-кудыжым вашкерак шкеак кучен ончымо шуо. Телефоным вераҥдаш келыштарыме эҥертышым (подставкым) налде шым чыте. Шуко тӱрлӧ кокла гыч чиялтыдыме, тамле пушан пу «эҥертыш» поснак чоным сымыстарыш да тыгай моторлыкым ыштышын озаж дене палыме лияш кумылаҥдыш.
– Шочмо ялем – Мучашъер (Волжский район). Рушлаже Микушкино. Ешыштына шымытын улына, мый эн изиже улам. Изай-шамычем тиде ялыштак илат, акай-влак унала веле толыт.
Изи годсек чыла шке кид дене ышташ логалын, тӧрлаташ, уэмдаш. Кугурак класслаш коштмо годым изам изи пӱкеным (табуретым) ыштыш. Мыят – почешыже. Ни сай оҥа, ни инструмент лийын огыл. Куэ комыля гыч товар дене чоклен (локшинчын – авт.) луктына ыле. Йӧра кеч ий ден пу чӧгытшӧ лийыныт. Ончыч пеш уда лектыт ыле шинчаш келыштарме явалана (ӱзгарна – авт.), варажым эркын-эркын тиде кидпашам тунемме.
Такшым пӧртыштына йӧратыме сомылым ышташ посна лук эре лийын. Шарнем, изирак годым пикш варам тодына, модыш машиналан оравам пӱчкедена ыле. Кугу лийме семын пӧлемнажат кугемын. А вара изам-влак ешаҥыч, шкаланышт пӧртым чоҥышт. Мыят ӱдырым нальым. Пелашем дене мландым нална, пӧртлан проектым шкеак шонышна, пӧртым чоҥышна, – каласкалыш Алексей Леонидович.
У илемыштыже Алексей Кудрявцев шке йӧратыме сомылжым шукташ мастерскойым ямдылен да ынде яра жапыште эре кидпашам ышта. Яра жап шуко манаш ок лий. А.Кудрявцев «Газпром трансгаз Нижний Новгород»команийын филиалыштыже, Волжский ЛПУМГ газотранспортный предприятийыште, телемеханике шотышто инженерлан пашам ышта. Туге гынат, мастар кидеш икте почеш весе пу арвер-влак «шочыт». Чон йодмо почеш шуктымо сомылжо нерген кидмастар тыгерак ойлыш:
– Шке кид дене ыштыме пӧрт, монча, нӧреп – теве мыйын эн кугу да кӱлешан «арвер»-шамычем. Кидпашалан жап пеш шагал кодеш. Кастене толам, каналтем, ончыч сурт сомылым ыштем, вара, жап лиймеке, кидпашалан пижам. Тӱрлӧ табурет, пӱкен, тӧрзам ковыраҥдыме окнасерга, икмыняр сӱретан панно. Паштенге (пытартыш авт.) жапыште шуко гына телефоным кучышо явалам ыштенам.
Усталык паша полшымо дене айдеме тӱнялан, илышлан куанен ила. Кидпаша – тыгаяк усталык сомыл. Айдемылан тудо – пакчасаскалан вӱд гаяк. Мыят пум тӱрлӧ арверыш савырымем годым вий-куатым шижам да куанем.
Палдарена: Волжский район Пызьыргуп ялысе книгагудышто Алексей Кудрявцевын пашаже-влакым чумырымо ончер пашам ышта. Тудо 5 март марте шуйна. Тылеч посна Чатка арвер-влакым налаш кумылда уло гын, кидмастарлан йодмаш-серышым возен колташ лиеш. Мутлан, мыйын йодмо телефоным кучышо «эҥертышем» (подставкем) арнят ыш вучыкто, толын шуо веле…
