Лишыл еҥлан — поро мут
Лишыл еҥ нерген ойлымо поро шомак чоным ырыкта. Медведево посёлкышто илыше Снежана Никитина деч тыгайрак серышым налынна:
«Пелашемын коваже, Туреева Нина Николаевна, Медведево район, Азаново сельсовет, Яндуш ялеш шочын. Ятыр жап колхозышто, вара птицефабрикыште птицеводлан пашам ыштен. Кум йочам ончен-куштен, но эргыжын ӱмыржӧ кучык лийын. Кок ӱдыржӧ , куд уныкаже, шым кугезе уныкаже улыт.
Надежда уныкаже Америкыште ила, Станислав уныкаже Чечня республикын ФСБ службын пашаеҥже. Ковашт деке яра жап лийме семын толын каяш тыршат.
Кызыт кована Роҥго селаште Алевтина ӱдыржӧ пелен ила. Пидаш йӧрата. Йӱдшӧ-кечыже пидеш. СВО-ш салтак-влаклан 50 мужыр носким колтымо. А эше кована Медведево вел шочмо мурсем почеш мурен-кушталташ пеш мастар.
Кована тений октябрьыште 84 ийым тема. Ме тудлан пеҥгыде тазалыкым тыланена, ӱмыржӧ кужу лийже!»
