Пӧртыштӧ – «тошто» пуш
Южо пӧртыштӧ але пачерыште нерым чыгылтарыше «тошто» пуш шижалтеш. Тыгай ӱпшым кузе пытарыман?
- ида ӧркане, кӱлеш-оккӱл арвер-влакым илемда гыч кораҥдыза. Уто арверлан кӧра пӧлемыште юж сайын ок кошт.
- Чыла вургемым, куэм гыч ыштыме шартышым мушкедыза, ковёрымат химчисткыш пуыман
- Окнам, омсам, пырдыжым, кӱварым эрыктыше вартыш дене мушкын налман
Пуш шукыж годым тӱрлӧ бактерий але поҥго-влаклан кӧра лектеш. Нуным тыге пытараш лиеш
- Уксус (олман але тыглай). Ик стакан вӱдыш кочмо совла уксусым пыштыман, ты вартышеш лапчыкым нӧртен, чыла ӱзгарым тӱжвачат, кӧргӧ вел гычат йыген лекман да кукшын ӱштман.
- Марганцовко. Тудым уксус семынак кучылташ лиеш, но шемалге арверым мушкаш веле келшен толеш.
- Мебельым тыгай вартыш эрыкташ полша: кок стакан вӱд, ик совла уксус да тынарак лимон кистлота да 20 мл вишкыде шовын. Шоҥаҥдымеш варен, мебельым йыгыман да ик-кок шагатлан кошкаш кодыман. Вара щётко дене эрыктен налман.
- Чыла эрыктымеке, пуш уэш ынже лек манын, полкылашке лимон шӱмым, тыгыдемдыме кофем але содо ден лимон кислота вартышым вераҥдаш лиеш.
