Пӱртӱс эмын пайдаже

Лӱмегожым ожнысек эмлыше вондо маныт. Тудо тӱрлӧ чер дене кучедалаш полша. Кичкыже поснак пайдале.

Лӱмегож кичкым тын пытымаш (одышке), астме, цистит, геморрой да шуко-шуко моло чер годым кучылтыт. Кичке дене отварым ышташ гын, пагарыште шукшым пытараш лиеш маныт.

Лӱмегож кичке тыгак сакыр диабет годым пайдале, коваште черым да лӧчымашым (отекым) эмла.

Лӱмегож кичкан ванныйым ышташ пайдалылан шотлалтеш. Тудо чогашылыште (мышцы) да йыжыҥлаште (суставы) корштымым иземда. Тидлан 200 гр кичкым шолшо вӱдыштӧ шинчыктыман да, шокте гоч шӱрен, леве ванныйыш ешарыман. Тыгай вӱдыштӧ 10-15 минут кияш лиеш.

Кунам погаш?

Лӱмегож кичке сентябрь-октябрьыште шемалге-канде тӱсым налеш, лач тунам тудым погаш темлат. Тидлан вондо йымалан куэмым шаралтат да укш-шамычым эркынрак рӱзалтат. Молан эркын? Чот рӱзымӧ годым кичке дене пырля кӱын шуктыдымо ужар кичке-влакат йогаш тӱҥалыт. Шарныза: лӱмегож кичкым погаш манын, укшыжым пӱчкедыман огыл! Тыге те вондылан эҥгекым ыштен кертыда.

Кузе аралаш?

Кичкым шӱк деч эрыктыман, юж сайын коштмо верыште коштыман, тыгодым южын температуржо +30…+35 градус деч шуко лийшаш огыл. Тыгай эмым 3 марте аралаш лиеш.

Тӱткӧ лийза!

Пӱртӱсын пуымо ты эм чыла еҥлан келшен ок тол, противопоказанийжат ятыр. Мутлан, тыгай эмым мӱшкыран-влаклан, гастрит, язве, верге (почка) чер дене орланыше-шамычлан йӱаш ок лий. Лӱмегож кичкым шуко кочшо-влакын кочкыш шолдыргымаш (расстройство пищеварения), аллергий лийын кертеш. 

Шарныза!!!

Пӱртӱс эм дене эмлалтме деч ончыч врач деч каҥашым налза!