Перкан лийже!

«Птичье молоко» торт

Руашлан кӱлыт: 7 муноптем, ик стакан ложаш, 100 гр шӱшмӱй, пел стакан сакырложаш, ик чывыштыш ванилин, ик изи совла уксус дене гаситлыме содо (але разрыхлитель).

Суфлелан: 20 грамм желатин, 7 муношо, ик стакан сакырложаш, 170 гр шӱшмӱй, 250 гр сгущёнко, кӱзӧ мучашеш налме лимонный кислота.

Глазурьлан: 150 гр кочо шоколад, 180 гр шӧрӱмбал (сливки), 30 гр сакырложаш, 30 гр ӱй.

Муноптемыш сакырым, ванилиным пыштыза да ошеммешке лугыза. Лугымыда годымак тушко пушкыдо шӱшмӱйым ешарыза.

Ложаш дене разрыхлительым (содым кучылтыда гын, тудым вигак руашыш пышташ лиеш) варыза, тудым муноптемыш ешарыза, руашым нӧштылза. Коржым ыштен, формыш пыштыза да 200 градус марте ырыктыме духовкыш 17-20 минутлан шындыза. Тиде жапыште желатин ӱмбак пел стакан пӧлемысе температуран вӱдым опталза, лӧчаш кодыза.

Духовко гыч коржым луктын йӱкшаш шындыза. Суфлем ышташ тӱҥалза. Тидлан пушкыдо шӱшмӱйым миксер дене, сгущёнкым ешарен, ошеммешкыже лугыза.

Лӧчышӧ желатиныш 125 гр сакырым ешарыза да тулеш ырыктыза, но шолаш ида пурто. Вара йӱкшаш кораҥдыза.

Муношым, холодильник гыч луктын, миксер дене шоҥ лиймешке лугыза, 125 гр сакырым, лимонный кислотам да ванилиным ешарыза. Вара йӱкшаш тӱҥалше желатиным тушкак изин йоктарыза. Миксерын писылыкшым иземден, тушко шӱшмӱян да сгущёнкан кремым ешарыза.

Коржым кок лончылан кӱзӧ але шӱртӧ полшымо дене пӱчса. Ик лончым формыш пыштыза, тушко суфлен пелыжым опталза, ӱмбакыже эше ик лончым да кодшо суфлем пыштыза. Тортым холодильникыш 1,5-2 шагатлан кораҥдыза.

Глазурьлан изирак каструльыш шӧрӱмбалым темыза, тушко сакырым ешарыза да тулеш сакыр шулымешке ырыктыза.

Посна мискышке шоколадым тыгыдемден пыштыза, вара тушко шокшо шӧрӱмбалым опталза.  Шоколадын шулымешкыже лугыза. Шӱшмӱйым ешарен, 4-5 минут варыза.

Тортым формо гыч лукса, ӱмбакыже йӱкшемдыме глазурьым опталза да уэш холодильникыш ик шагатлан шындыза. Тортым шонымыда семын сӧрастараш лиеш.