Маска, пӱчӧ, ирказа… Чылажат чонан гай

Маска, пӱчӧ, лев, ирказа… Пу гыч пӱчкедыме нине янлык-влак пуйто чонан улыт. Чапле да оҥай скульптур-влакым Марий Турек район Сысоево ялыште илыше Илья Богданов шке кидше дене ышта.

Айста меат тиде мастар дене лишкырак палыме лийына.

– Мый Марий Турек район Сысоево ялыште илем. Кокымшо августышто 50 ийым теменам. Марий Элысе тул ваштареш кучедалше охраныште водительлан пашам ыштем.

Кок эргым уло. Кугуракше, Никита, СВО-н участникше. Молодец эрге. Юмо тудлан тазалыкым пуыжо. Изирак – Константин, 2-шо классыште тунемеш. Мыйын полышкалышем. Южгунам видеом сниматлена, лаштыкышкына луктына. Умбакыжат тиде пашанам шуяш тӱҥалына.

– Кунамрак пӱчкедаш тӱҥалында? Кӧ кумылаҥден?

– Пӱчкедаш кумыл изи годсек лийын. 22 ияш улмем годым гына тидым ышташ тоштынам. Пӱчкедаш шкеак тӱҥалынам. Варажым скульптурный резьбалан тунемаш тӱҥальым. Тидлан мылам Сенде мастар Юрий Малинов кугун полшен. Тудым мый шке туныктышемлан шотлем.

– Скульптурылан могай пушеҥгым ойыреда?

– Писте, пӱнчӧ, тополь. Пушеҥгым эн ондак ончена, кадыржым, укшыжым чыла пашаш колтена. Тичмаш пушеҥге гыч ышташ толашена.

Еш огыл гын, омат толаше ыле. Оксаже вет кугун ок лек, но еш умыла.

– Пашада-влакым ужаледа мо? Могай ак дене?

– Ужалаш толашена, кӧлан сеҥена гын.  Коммерсантше мый сайжак омыл. Налыт гын, налыт. Ончылгоч оксам ом йод. Келша гын, пуат. Йодам, сита мо. Окса шотышто. Изиракшым 8 тӱжемлан пуэм. Маска-влакым 10-12 тӱжем гыч тӱҥалын. Уке гын смыслжат уке. Кызыт вет чылажат шерге. То лакым нал, то пропиткым.

– Тау, йодышемлан вашештымыланда. Пашада ушныжо!