«Наҥгае мыйым, корно»

18 октябрьыште Йошкар-Оласе «Башня» тӱвыра-ончер рӱдерыште самырык поэтессе Виктория Матвеева дене усталык вашлиймаш эртаралте. Уна-влакым автор «Наҥгае мыйым, корно» сылнымут ойпогыжо дене палдарен. Тыгак Виктория «Языковая Арт-резиденция» проектын участникше-влакын произведенийыштым чумырымо «Родное» книган кузе савыкталтмыже нерген каласкален да проект кышкарыште ямдылыме сылнымут-видео паша-влакым ончыткен.

Виктория Матвееван черетан (кокымшо) почеламут ойпогыжо Светлана Эсаулова лӱмеш фондын премийже дене савыкталтын. Автор кодшо ийын ты премийын лауреатше лӱмым налын. Калык-влак кокласе кыл шотышто ресурсный рӱдерын Президент фондын полшымыж дене эртарыме «Языковая Арт-резиденция» проектыш поэтессе тений кеҥежым ушнен. Кузе тушко логалмыж нерген автор тыгерак ойла:

– Возышо-влакым тиде проектыш ӱжмӧ нерген уверым интернетыште ужынам. Тӱрлӧ лекций, мастер-класс-влак лийыт манын пален налмеке, тушко ушнаш, возымо мастарлыкым саемдаш кумылем лекте. Пашана-влакым видеош возат да книгаш чумырат  манын, тунам паленат омыл.

Пайрем гыч фото-влак:

– Кеч-могай пашам ыштымеке, сай лектышым ужаш куанле. А паша лектышна моткоч тӱвыргӧ, кумылым нӧлтышӧ! Ме тӱрлӧ йылме дене: руш, марий, немыч, чуваш, коряк, ненец, башкир, коми, бурят – йылмыла дене возышо 10 участник лийынна. Проектын тӱҥ сомылжо возаш туныкташ да возымо технике дене палдарымаш огыл, а кажне возышо шке возымыжым видео дене сӧрастарен ончыктышаш. Тыгай пашам шукташ оператор-влак, проектын вуйлатышыже, полшышыжо-влак мемнан дене пырля пашам ыштеныт. Адакшым участник-влакат ваш полшымо. Кеҥеж мучко возымо пашам мастер-влак монтироватленыт. Мемнанат кодшо кеҥежлан пашана лийын: сылнымутым руш йылмыш кусараш, келшыше семым муаш.
Тауштем «Литера» журналын тӱҥ редакторжо Сергей Щегловлан сылнымут переводым ыштымыжлан да Татьяна Ямбердовалан сылнымутым шке семже дене келыштарымыжлан. Тыге шыжылан кажныжын сылнымут проектше шочын. Вет сылнылык гочынат шочмо йылмым арален кодаш, вияҥдаш лиеш.
Чонлан келшышымат каласен кодымо шуэш ыле. Марий тувырым шуэн чияш логалын гын, проект эртыме жапыште тудо тӱжвал тӱсемым ала-мыняр гана сӧрастарен. Марий вургем, шонем, сӧралын возын сылнымут корныш. Кап-кылланат куштылго ыле пеш. Видео лектышыжат лийже куштылго кумылан, ласкалыкым кондышо, — каласыш В.Матвеева.

Самырык поэтессын у книгажым ужын, тыгак Россий кӱкшытан тыгай пашаште мастарлыкшым ончыктымыжым пален, йывырташ гына кодеш. Умбакыжат Викториялан у да сай кӱкшытым тыланена.

Шке дечем ешарыме шуэш… Моткочак куанле, кунам автор-влак шке вий дене, шке кумылын мастарлыкыштым вияндаш тӱрлӧ йӧным муыт. Ты шотышто кызыт теве мо кумылым волта: самырык автор-влак пытартыш жапыште шке моштымышт семын гына вияҥаш тыршат. Республикысе икмыняр сылнымут премий, семинар-влак, мутат уке, могай гынат шӱкалтышым ыштат. А элна кумдыкышто автор-шамыч шке лӱмжыштым да шочмо калыкыштым кузе моштат, туге чапландарат гай чучеш. Пайдале да кӱлешан проектлаш ушнаш утларак полыш лийже ыле, йӧн пуалтше ыле. Тыгай проект-влак нерген увер жапыштыже самырык автор-влак деке кеч миен шужо ыле. Вет шукыж годым вес регионлаште эртаралтше сылнымут мероприятий-влак нерген серызе-влак палыдеак кодыт…
Тек марий сылнымутна ончыкыжымат вияҥаш тӱҥалеш да эшеат кумда шулдырым шаралта!

Фото-влак: https://vk.com/ggdevho