Сылнымутышто у еҥ

Римма Якаева Морко район Изи Маршан ялеш шочын. Изинекак пӱртӱсым йӧратен, янлык-влакым, кушкылым эскерен.
Школ деч вара Озаҥ оласе ветеринарный академийыште тунемын. Ятыр жап Советский район Роҥго кундемысе «Коммунизм верч» («Мир») озанлыкыште тӱҥ ветеринарлан тыршен. Колхоз шаланаш тӱҥалмеке, школышко завхозлан пашаш пурен. Кызыт сулен налме канышыште.
Роҥго селаште ила.
Римма Александровнан изирак ойлымашыжым лудаш темлена.

Шыҥшале

Кеҥеж. Шудым ыштыме жап. Шудым овартен пытарышнат, каналташ шична. Мый омарта воктек шуҥгалтым, то каваш, то омарташ ончем.
Омарта ӱмбалне шыҥшале-влак тыш-туш кудалыштыт. Нуным ончен, шыдем лекташ тӱҥале. «Вот молан нуно кӱлыт? А? Могай пайдам кондат? Пӱртӱсын пуымо ямде емыж-саскам кочкытат, ласкан канат, модыт. А вара шылын возыт да малат. А мемнан пашана нигунамат ок пыте: я шудо, я пареҥге, копшаҥгым пого, школышто дежурство… Ой, шотленат ом пытаре! А нуно кудалыштыт тыште…», — шоналтышым шке семынем. А вара ик шыҥшальым кучышымат, почшым шо-орт кӱрльым да мӧҥгеш омарта ӱмбак пыштышым. Ала лӱдмыж дене, ала пеш корштен, пеш оҥайын кудалыштеш. Мыйым тиде веселаҥдыш веле. Вес шыҥшальым нальымат, тудынат почшым кӱрльым да икымше почдымо родыж деке колтышым. Ынде коктын кок могырыш пеш кудалыштыт. Мыланем пеш оҥайын чучын, эсогыл йӱкын воштыл колтышым.
Авам мыйын могырыш ӧрын ончале, а вара почдымо шыҥшале-влакым ужо.
— Почыштым тыяк шыч кӱрышт дыр? – йодо тудо.
— Мый. Оҥайын койытыс… А такше молан нунылан поч? Вет тушто ны кӧргӧ ӱзгар, ны йол, ны вуйдорык уке. Сӧраллан гына пижыктен шындыме гай коеш, — маньым мый.
Авам шыдешт кайыш, тӱрлӧ семын вурсаш тӱҥале. Мом гына ойлен ыш пытаре: «Осал, азырен, нимом да нигӧм чаманыдыме, Юмылан пӱрдымӧ да эше, эше…»
— Авай, мом тынар вурсетше? Шыҥшальын почшо уэш кушкеш. Мый кодшо гана изи почан кугурак шыҥшальым ужым. Тудын почшым мый кӱрлын омыл, чынак-чынак…
— Шыҥшальын поч кушкеш, туге, но тидлан мыняр вий кӱлеш! Южышт пеш чот черланат, коленат кертыт. А нине изи чукай-шамычше кушмо олмеш, шке почыштым кушташ тӱҥалыт, — тургыжланенрак ойлыш авам.
— Йӧра-йӧра, — манам. Тылеч вара шыҥшальын почшым ом кӱрышт, ужаванат мӱшкыржым корен, кӧргыжым пургедаш ом тӱҥал.