Сай саскам налнет – ямдылалт!

Кеҥежым сай пакчасаскам налаш манын, пашам ондакак тӱҥалман. Сандене кажне гаяк озаватын март тӱҥалтыште сомыл койын ешаралтеш. Пурысым, баклажаным ӱдымеке, помидорым ӱдаш жап шуэш. Росота таза лийже манын, мландым чын ямдылыман.

Нӧшмым ӱдымыда деч ончыч шекланыза: пакча гыч налын кодымо рокышто шун (мландым пеҥгыдым ышта, вӱдым да южым сайын ок колто, садлан росота черланен кертеш), кодшо кушкыл (тудо шӱеш да шокшым лукташ тӱҥалеш, мландыште азотым шагалемда, тыге самырык росота вашкен «кола»), шӱкшудо нӧшмӧ (черым шаркала), копшаҥгын личинкыже але шукш (росоталан эҥгекым кондат) лийшаш огытыл.

Кевытысе рок вӱдылкаштат возымым лудса. Кӱшыл торфан, эҥерысе ошман, биогумусан, микро- ден макроэлементан, вермикулитат рок росоталан утларак келша. А ӱлыл торф когартен кертеш. Сандене тудым шке мланде дене вараш гына налза.

Южо фермер-влакын ойлымышт почеш, шке пакча гыч налме рокым ешараш гын, пакчаш кусарыме годым помидор росота сайрак тырла. Мландым налме верыште помидор да вес пасленовый пакчасаскам икмыняр ий куштымо огыл гын, тудо келшен толеш. Киярым, кабачокым, зеленьым куштымо верыште мланде путырак келша. Парник гыч мландым налаш ок темлалт.