Пеледыш гае мотор, тул гае шокшо
Пеледыш гае мотор, тул гае йӱлышӧ шокшо чонан – тыгай улыт «Тулпеледыш ансамбльын участникше-влак.
«Тулпеледышлан» улыжат кок ий утларак гына. Туге гынат ансамбль ты кӱчык жапыште еҥ-влакын чоныштым савырен кертын, марий муро да куштымашлан утларак шӱмаҥден.
Каласен кодыман, «Тулпеледыш» «Онар» йоча куштышо ансамбльыш коштшо йоча-влакын ача-аваштым чумырен. Туныктышо да воспитатель, мер пашам шуктышо да производствыште пашам ыштыше еҥ-влак кас еда Калыкле тӱвыра пӧртыштӧ погынат, ик шагат жапыште репетицийым эртарат. Тиде жапыштак икшывышт воктенысе залыште марий куштымаш-влакым тунемыт.
Ача-ава-влак шкаланышт сценыш лекташ мотор тувырым шкеак ямдылат. Пошкырт, Шернур вел костюм-влак, марий тӱран ош платье… Шуко тувырым ансамбльын участницыже Елена Александрова урген. Тудак мотор сӧрастарыш-влакым ыштен, тувыр-влакым чинче пырче-влак дене сӧрастарен.
«Тулпеледыш» Йошкар-Олаште эртаралтше ятыр концертлаште да фестивальлаште мастарлыкшым ончыктен, вес кундемышкат лектын коштын. 2023 ийыште Татарстан кундемыште эртаралтше «Семыкыш» миен гын, ӱмаште Одо кундемыште лийын. Шукерте огыл Т.Дмитриева лӱмеш «Эрвелмарий» калык ансамбль дене пырля Советский район Алексеевский кундемыште илыше еҥ-влакым чапле концерт дене куандарен. Лишыл жапыште «Тулпеледышым» эше икмыняр концертыште ужаш лиеш.
«Илышыште ме икшывына-влаклан пример улына, а тыште ме йоча-влакна гаяк чолга лияш тунемына, нунын дене пырля сценыш лектына. Адакшым ик сомылым ыштен, мемнан коклаште кылна пеҥгыдемеш гына», — каласышт «Тулпеледыш ансамбльын участникше-влак.
