Поэзий пӧлемыште вашлиймаш
Пытартыш жапыште «Сылнымут унагудо» лӱм Интернет тӱняште чӱчкыдын йоҥгаш тӱҥале: ик вере тиде пашалан грант оксам пуат, вес вере паша планышкышт пуртат. Мемнан «Сылнымут унагудына» моло деч ойыртемалтше. Ме отчетлан огыл, а шке кумылын, чон йодмо почеш погынена. Тыгай погынымашнам шке коклаштына «квартирник» але вес семынже «галстук деч посна вашлиймаш» манына.
Республикыштына ынде икмыняр ий «Чонволгалтыш» семинар-лабораторий пашам ышта. В.Колумб лӱмеш йоча да самырык-влакын книгагудыштышт эртаралтше занятийлаште участник-влак почеламутым, прозым лончылат, возымо мастарлыкыштым вияҥдат. Тиде моткоч сай паша, тыгодым каныме сынан, поэзий дене кылдалтше мероприятийым эртарыме шуын.
Паша деч вара иквереш чумырген, вашла почеламутым лудын, каналтен, чайым подылын, ласкан мутланен шинчылтме кызытсе илышыште ок сите гай чучын. Сандене ик ий ончыч тыгай сынан мероприятий нерген шонаш тӱҥална. Вара, верым муын, чумыргаш кутырен келшышна.
Икымше вашлиймашна моткоч сайын, ик шӱлыш дене эртен. Тунам лӱмлӧ поэт-влакат ушненыт да шке почеламутыштым лудын пуэныт. Лач ик ситыдымаш лийын: официальный манме формат деч тӱрыснек кораҥын кертме огыл. А тиде гана Марий самырык театрыште погынен, вигак кутырен келшышна: ме тышке почеламутым лудаш да колышташ толынна, нимогай лончылымаш але иктешлымаш лийшаш огыл. Куанен каласыман, шонымашкына шуын кертна.
Тӱҥалтыште ӧрмалгенрак лудна гын, вараже почеламут-влак икте почеш весе эҥер вӱдла йогаш тӱҥальыч. Каласен кодыман, мероприятийыште могай почеламут йоҥгалтшаш нигӧ ончылгоч ямдылен огыл, чылажат шке семын каен. Икте ял нерген лудаш тӱҥалын гын, вес поэт тиде темымак умбакыже шуен.
Кок шагат жапыште ме тӱрлӧ почеламутым колыштна. Иктыже воштылаш таратен гын, весыже шинчавӱдым луктын. Кажныже — шкешотан, ойыртемалтше, тӱрлӧ образлан поян, эсогыл элнан тӱрлӧ кундемжылан келшыше.
Вашлиймашна икымше семынак ик шӱлыш дене эртен кайыш. Вес гана ноябрьыште погынаш кутырен келшыме. Тунам ме шочмо кундемнан лӱмгечыжлан пӧлеклалтше почеламут-влакым ямдылаш тыршена.
