«ЮЛСЕР КУНДЕМЫН ӰДЫРЖӦ»
Теҥгече «Юлсер кундемын ÿдыржӧ» конкурсын интернет-йÿклымашыже мучашлалте. Ты таҥасымаште Алина Семенова (Макарова) ончыко лектын.
Конкурсыш ушнымыж нерген тудо тыге палдарыш:
— Тыгай конкурсыш мыйым тылеч ончычат ÿжыныт, но ушнаш кумылем лийын огыл. Тений ты пашалан «кÿын» шумемла чучо.
Пӧтъял клуб вуйлатыше Андрей Яруков (авт.- ондак М.Шектан лÿмеш драмтеатрын артистше) конкурсышто мастарлыкем тергаш темлыш, тореш шым лий. Каласен кодыман, конкурсыш эн пытартыш ушненам, сандене видеопрезентацийым да моло сомылым ышташ жап шÿдӧ лийын.
Каныш кечын шочмо кундемыш мийымеке, вигак пашалан пижна. Тудо кастенак видеом ямдылаш тÿҥална. Ондак Пӧт эҥер воктене, вара Шемъер воктене сюжетлам войзенна. Кокымшо верыште лиймеке, Андрей ик шонымашым илышыш шыҥдараш темлыш: марий вургемым чийыше ÿдыр вÿд гыч лектеш. Мый шым торешлане.
Вес кечын ныл шагат эрдене Российын Геройжо Валерий Иванов лÿмеш тоштерыште (Олыкъял) кÿнчыла дене шÿдырымӧ татым войзенна. Пасушто шудо орам ужмеке, тудымат эртен каен ышна керт. Игече йÿран да йÿштӧ ыле гынат, видеолан тиде ужаш кÿлешак манын, чыташ логале.
«Джигит» лÿман имне дене видеом ямдылаш поснак лÿдмашан ыле. Туге гынат чыла шонымынам шукташ тыршенна.
Ик йÿдыштӧ Андрей Сергей йолташыж дене видеом ямдыленыт, а мый видеовизиткым шке иктыш «погенам». Эрлашыжым пашна-влакым конкурсыш колтенна.
А тиде йÿклымашыште ончыко лекташ-кугу куан. Тугеже калык акла, пагала мыйым. Видеомат кÿлеш семын аклен Тидыже мыланем эн шерге!Ынде умбакыже 12 июньым чон вургыж вучена, — каласкала Алина.
Йÿклымаш моткоч «шокшын» эртен. Тушко Юлсер кундемын калыкше веле огыл, уло республик ушнен манаш лиеш. Кажныже шке палыме еҥжылан але родыжлан йÿклаш вашкен. А Алина Семенова верч йÿкым пуышо-влакым ончалаш гын, финн-угор тукым калык гыч лекше-влакат, тора Моско ден Санкт-Петербург ола гычат еҥ-шамыч лийыныт.
Конкурсанке-влак шке мастарлыкыштым 12 июньышто Карай ялыште верысе «Пеледыш пайрем» годым калык ончыко аклаш луктыт.
А ме нунылан уло кумылын тиде кечым сайын эртараш тыланена!
