«Шудым солен ок мошто гын, нӱшкӧ савам пуэна…» манын сӱан мурышто мурат. А вот мелнам кӱэштын огеш мошто гын …
«Шудым солен ок мошто гын, нӱшкӧ савам пуэна…» манын сӱан мурышто мурат. А вот мелнам кӱэштын огеш мошто гын … — Надежда туныкта. Вет тудо изиж годсек кочкаш шолташ йӧрата. Сандене мелнам веле огыл, моло кочкыш-йӧрварым ямдылаш туныктен кертеш.
Надежда Артемьева Провой кундем Какшамарий ялыште шочын-кушкын. Вич ияшыж годсек мелнам кӱэштын мошта.
— Кеҥежым кочкаш шолташ келыштарыме кухньышто кермыч дене оптымо плита шога ыле. Ача-аван пашаш кайымекышт, мый кугураклан кодынам. Толмыштлан сурт-сомылкам ыштен шуктыман улмаш. Тыгак кочкашат шолаш кӱлын. Кажне гана тӱрлӧ кочкыш дене куандараш тыршенам. Кокланже шонымо семын лектын огыл гынат, ты паша деке йӱкшен омыл.
Кызыт ешан улам. Пелаш да йоча-влак иктаж-мом уым, тамлыдыме кочкышым ышташ йодыт гын, уло кумылын шукташ пижам. Вет тиде эн ондак шканем оҥай.
Латныл ий шочмо вер деч ӧрдыжыштӧ, Дагестаныште иленна. Тушто мый Кавказ калыкын кочкышым шымленам, тӱрлӧ эсперементым ыштенам.
Мӧҥгеш пӧртылмеке, пелашем опытем молылан полшен кертеш манын ӱшандарен. Тыге ме «Sweet_Bee_12rus» лӱман кондитерский студийым почынна, — палдарыш Надежда.
Кызыт ты студийыште мастар-класс-влакым, калык кочкыш дене сийлыме вашлиймашым, пайремым эртарат. Турист-влакалан марий вургемым чиен, марий кочкышым ямдылат. Тыгак Надежда йодмо почеш тортым да моло тутло кочкышым кӱэштеш. Эсогыл мыят тудын ямдылыме кок тӱрлӧ тортым тамлен онченам.
Студийыште сомылка эре лектеш, но озавате тыгак шке мастарлыкшым вес вереат тергаш тырша. Шукерте огыл Йошкар-Олаште ялозанлык сатум ужалыме ярминга эртаралтын. Тушто Н.Артемьеван сатужым ужаш да налаш йӧн лийын. Тыгак ынде икмыняр кеҥежым эртаралтше регион-влак кокласе «ЙошкаЕш» фестивальыште калыкым сийлат.
«Тыгай проект-влакыш ушнымаш мылам вийым, ешартыш шӱлышым пуа. Адакшым ме тыге «кушкына», весе деч молан гынат тунемына», — каласкалыш Надя.
Надежда деч рецепт
Шпинат да сыр дене ямдылыме омлет
Кӱлыт:
— 2 муно;
— 2 кугу совла шӧр;
— ик кормыж шпинат;
— 30 г сыр;
— пел помидор;
— ик пӱй чеснок;
— шинчал да шем пурыс.
Муно ден шӧрым пырля лугыза, там почеш шинчалым, шем пурысым да чеснокым ешарыза.
Шпинатым пушкыдеммешкыже салмаште жаритлыза. Вара тушкак муно вартышым опталза да ӱмбач сырым шавалтыза. Крышке дене леведын вич минут кӱктыза.
Эр кочкыш ямде!
