Мый марла шонем
Автор – Зинаида Поликарпова.
Эр автобусышто кудалам. Москваште пашашке шке жапыштыже миен шуаш манын, пеш эр кынелман. Автобусыш шичмеке, верым налын шуктет гын, мучаш станций марте нералташат йӧн уло. Но таче мыйын омем йылт шулыш. Окнаш ончен, пӱртӱсын вашталтмыжым, кавасе пыл сӱретым ончаш, шымлаш пеш йӧратем. Автобус шогалме верыште еҥ-влак пеш пурат-лектыт. «Чылан, витне, пашашке вашкат», – шоналтышым мый. Могай гына калык уке, могай гына койыш-шоктыш, могай гына чием! Тӱрлӧ йылман , сынан, тӱрлӧ коваштан. Виян руш йылме могай гына калыкым ушен ок шого! Шӱдӧ, тӱжем, миллион дене еҥ, шотлен пытарыдыме калык. Ялт куткышуэ.
Автобусет метро деке конден шуктыш… Оҥай: тынар йылман калык коклаште иктыже мый улам. Мый, марий ӱдырамаш. Марий йылмын ямжым шижын кушшо, марла ойлышо. «А кузе мый шонем, марла я рушла?» – вуйышто тыманмеш йодыш шочо. Марий йодыш. Да тунамак марий шомак-влак вашмутым луктыч, марий шонымаш пӧрдаш тӱҥале: мый марла шонем.
Тӱня картыште марий мландына изи тамга семын веле палемдалтын гынат, йылмын вийже пеш кугу. Кеч-могай тора элыште я олаште илет гынат, марий айдемылан шке мландыж деч шерге нимат уке. Аван шӧржӧ дене пырля налме койыш-шоктыш, илыш куат… Тукымвожым, шочмо кундемын пӱртӱсшым да йылмынам пагалыме да йӧратыме кумыл курым мучкылан мемнан пеленак кодеш да илыш корно дене наҥгая. Сандене кёч кушто лийына гынат, эреак шинчана дене марий кундем дене кылдалтше сӱретым ужнена, пылышна дене марий йӱкым колнена, чонна дене марий койышым вучена да кычалына. Теве Сбербанк ончылно марий рвезе пеш талын ала-кӧ дене марла кутыра, а теве Марий Эл регионым ушештарыше 12 цифран машина эртен кудале, теве Москван тӱрлӧ луклаштыже я ик вере, я вес вере марий пайрем-влак эртат. Мутлан, шукерте огыл Екатерининский паркыште пеледыш пайрем эртаралте. Тыгак кевытлаштат чӱчкыдын Марий Элыште ыштен лукмо сатум ужаш лиеш. Чыла тиде чоным моткоч ырыкта. Мучашлан Щёлково автовокзал воктене эртен кайышемла, ӱдырамашын «Чебоксары – Йошкар-Ола, Чебоксары – Йошкар-Ола» манын кычкырен, автобусыш ӱжмыжӧ шижде шыргыжалаш таратыш…
Кажне еҥын тыге дыр. Кажнылан шке шочмо велже шерге. Тыге шонкален, тӱжем калык коклаш ушнен, мый кугу олан мланде йымал транспорт вӱршерышкыже ушнаш манын, метрош волышым. Элнан тӱрлӧ луклаж гыч толшо коллегем-влак дене пырля паша кечем тӱҥальым.
Аралыза ваш-ваш, пагалыза, келшен илыза. Тек марий мландына ыре пеледеш да тӱзлана.
