Пӧлек (мыскара ойлымаш)

Таче, пайрем деч вара икымше кечын, пашаш лекна. Но пашам ышташ иктат ок ярсе. Ӱдырамаш-влак 8 мартлан  кӧлан мом пӧлекленыт телефоныш сниматлыме фотом вашла ончыктылыт: пеледыш аршаш, алга, шергаш, тӱрлӧ вургем да тулеч моло…Мыят йолташ вате-влак коклаште пӧрдам, шкеже «мый дечем йодаш мондышт ыле», шонем. Уке, ышт мондо. Черет мый декем шуо.

— А тылат пелашет мом пӧлеклен? – йодыт.

— Мылам, — манам, — лач март тылзылан келшыше пӧлекым ыштен.

А шкеже  умбакыже ойлаш ом тошт. Кандашымше мартыште икшывем-влак эрден эрак саламлышт, ӧндальыч, шупшальыч, эсогыл мурымат муралтышт. А пелашем телевизорым чӱктен да, кидшым вуй йымак пыштен, диваныш шуйнен возын да ала-могай пеш оҥай передачым онча.

Мый воктекыже миен шогальымат, шинчам кораҥдыде, ӱмбакыже ончен шогем.  Икмыняр жап гыч тудо мыйын ончен шогымем  шиже.

—  А-а-а… пайрем  дене,  — каласышат, умбакыже телевизорым онча. А мый воктечше ом кораҥ.

—  Молан мешаен шогет, пӧлекымак ынет йод чай?   А мый тылат пӧлекым ыштенам.  Шарнет, декабрьыште портышкемым  налашет тӱжем теҥгем пуэнам, — ойла пелашем. — Мый тунам «тиде 8-ше март пайремлан» маньым. Тый тиде ойлымем  монденам шонышыч, очыни. Монден омыл, сандене вес пӧлекым мый дечем ит вучо.

А такше тенийысе мартлан тиде пӧлек лачеш веле толын улмаш. Пӧлекем дене моктанашат лиеш.

Римма Якаева.