Марла лудына!
Ынде латкок кече (таче латкумшо кече) #марлалудынамарафон шуйна. Кумылан-влак улыт, лудмо нерген шкешотан отчётым лаштыкыштыт вераҥдат. Тиде мемнам, организатор-влакым*, моткоч куандара. Но ты паша нерген изиш кумданрак палдарыме шуэш.
2024 ийыште Лариса Арламован Вконтакте воткылысе лаштыкыштыже Ленинград областьысе марий-влак коклаште книгам лудмо нерген марафоным эртарымыжым ужым. Ты шонымаш мыламат лишыл лие, сандене ты идейым кумдаҥдаш темлышым. Лариса Владимировнат тореш ыш лий. Тыге эркын марафонлан ямдылалтме паша тӱҥале. У ий вашеш чыла раш лиймеке, марафон тарватыме кечым ойырышна. Книгам лудаш таратыше марафонна 9 январьыште шке пашажым тӱҥале.
Марафоныш икымше кече гычак 50 наре йодмаш пурен. Участник-влак Марий Эл Республикын тӱрлö районлаж гыч, Татарстан, Одо, Республикла, Урал да Пошкыр кундем, тыгак Моско, Санкт-Петербург ола, Ленинградский область гыч улыт. А эн тора гыч ушнышо участник семын кызыт Голландийыште илыше Валентина Васинкинам палемдаш лиеш. Шкеже тудо Марий Турек районын шочшыжо.
Тӱрлӧ амаллан кӧра чылан икымше кече гыч ушнен кертын огытыл, сандене вараш кодшо-влаклан тидым ышташ 13 январь марте йöным пуэнна.
Палемдаш кӱлеш, марафоныш тӱрлӧ ийготан еҥ-влак ушненыт: илалшыжат, самырыкшат, школышто тунемшыжат. Икте поэзийым утларак йӧрата гын, весыже кугу романым лудаш шӱман. Участник-влак тӱрлӧ жанрым ойырен налыт. Тыгодым южышт автор нергенат возен кодат, произведенийым лудмеке шке шонымашышт дене пайлалтыт. А ала-кö видео-формат дене шке пашажым ямдыла.
Ме умылена, чылан ты «ӱчашымаште» мучаш марте миен огыт шу. Но тиде тӱҥ огыл. Тӱҥжö — ме книгам лудына, ушнам пудыратена, йылмынам лывыртена. Да эшежым кушкын толшо тукымлан сай примерым ончыктена. Вот тидыже эн кугу сеҥымаш!
Лариса Арламова, организатор:
— Тыгай марафоным эртарымым татар калыкын ужынам. Ты шонымаш мыланем келшен да марий йылмылан келыштараш шонен пыштенам. Эн ончычы ме тиде марафоным шкенан Ленинград областьысе «Ший корно» марий-влакын автономийысе еҥ-влак дене эртаренна. Умбакыже «Унагудо» интернет-журналын еҥже Вероника Мустаева дене тиде шонымашым кумдаҥдаш шонен пыштенна. Кызыт ужына, пашана арам лийын огыл. Но эн неле пашаже ончылно, шонем.
Ончыкылыклан ты проектым эше кумдаҥдаш шонымаш уло. Тек эше шукырак еҥ ты пашаш ушна. Тунам ме могай-гынат кышам ты тӱняште кодена, изи да надырым шке шочмо йылмынам вияҥдымаште, аралымаште ыштена.
Валентина Васинкина, участник:
Мутат уке, тыгай марафон-влак кӱлыт. Кызытсе самырык тукым шке йылмыжым огеш акле, марий ача-ава-шамычын шочшышт, марла шагал мутланат. Южын, чаманен каласаш логалеш, марлаже кутыренжат огыт мошто. Шкенан шочмо йылмынам аклен кодаш манын, марий литературо, тыглай вашмутланымаш моткоч чот кӱлешан! Шочмо йылме, тиде мемнан ик эн кугу поянлыкна лийшаш, кудыжым ме, марий калык, арален кодышаш улына! Ме огыл гын, кö?
Кугу таум каласыме шуэш организатор-влаклан, кö тыгай марафоным илышыш шыҥдараш шонен пыштен да калыкыш луктын!
Людмила Купсольцева, участник:
Марафон мыланем йылмым лывырташ да мутпоянлыкем кумдаҥдаш полша. Кажне кечын ик минутышто 2-3 мутлан шукырак лудам. Тыге шкаланем статистикым ыштылам. Тылеч посна йӱкын лудмо годым чурийлан массаж лиеш.
«Марла лудына марафоным» январь мучаште кошартена, но ӱшанена, тиде пытартыш онлайн-вашлиймашна огыл. А книгам ме тыгак уло кумылын умбакыжат лудаш тӱҥалына.
*организатор-влакым — марий йылмым, тувырам да йулам вияндымаште тыршыше «Тамга» мер организаций ден ден Ленинград областьысе марий-влакын «Ший корно» национально-культурный автономийже.
