Изи йылмат кугу пӱрымашан лийын кертеш
21 февральыште, Тӱнямбалысе шочмо йылме кечын, Волжск оласе Краеведений тоштерыште сылнымутым йӧратыше-влак погыненыт.
Марий Элнан чыла гаяк районжо уста еҥ-влаклан поян. Юлсер кундем нергенат тыгак ойлаш лиеш. Нунын коклаште поэт, писатель, журналист, композитор, мурызо, куштызо-влак улыт. Чыланат нуно шке вершӧрыштым моктат, тудлан мотор почеламутым, семым пӧлеклат. Иктышт шке илышыжым шочмо кундемже дене кылден гын, весышт тора кундемыш каен, садак шочмо-кушмо верым чӱчкыдын шарналта. Улыт тугаят, кӧ вес районышто шочын, а илышыжым Юлсер дене кылден.
Волжск олаште эртаралтше мероприятий Волжский районышто шочын-кушшо але шке жапыштыже тышке илаш толшо, тышан усталык шӱлышыжым пойдарыше еҥ-влакым чумырен. Уна семын Йошкар-Ола гыч Алена Яковлева ден Надежда Моисеева миеныт. Каласен кодыман, нунат шке пиалыштым лач тиде кундемыште муыныт, коктынат Нурмучаш Шайра шешке улыт.
Сылнымут пайремым эртараш тоштер фондын тӱҥ аралышыжлан Надежда Тимофеевалан ӱшаненыт.
Надежда Тимофеева: «Тыгай марий шӱлышан поэтический мероприятий мемнан тоштерыште икымше гана эртаралтын.
Тиде пайремым торжественно 2000 ий гыч палемдаш тӱҥалыныт. Тӱнямбалне 3 тӱжем утла йылме уло, нунын коклаште марий йылме шке вержым муын. Йылмын лывыргылыкшым, могай улмыжым, кӱлешлыкшым, акшым тудын дене кутырышо чот дене огыл вискале. Изи йылмат кугу пӱрымашын лийын кертеш. Кеч-могай йылме шке шочмо йылме дене кутырышо-влакым уша, акрет годсо йӱлам арален кодаш полша, илышыш оҥай, ойыртемалтше тӱсым пурта.
Марий йылмым арален кодымаште кызыт поэт-писатель-влак кугу пашам ыштен шогат. нуно марий йылме дене сылнымутым шочыктат да савыктен кодат. Вес гана шочшына, уныкана-влак тиде книгам налын, марий йылме дене лудаш тӱҥалыт».
Пайремыште ятыр почеламут йоҥгалтын, шочмо йылмым аралыме нергенат погынышо-влак чон почын мутланеныт. Йол ӱмбак пеҥгыдын шогалше поэт-влак пелен тӱҥалше автор-влакат лийыныт. Нунын коклаште — Нина Писарева. Нина Гурьевна салтакыш кайыше эрге нерген почеламутым шинчавӱд йӧре лудо.
Кум шагат утла шуйнышо мероприятий ик шӱлыш дене эртен кайыш. Пайремыш толшо уна-влак вес ганат тыгак погынаш кутырен келшышт.
