Авайна деч тунемына, тудлан тауштена
Шукерте огыл ӱярня пайремым пайремлышна. Арня мучко мӧҥгыштӧ ӱян мелнам кочмо деч посна интернетыштат ятыр «тамле» фото ден видео-влакым куанен ончышна. Теве ик тыгай чоным сымыстарыше паша-влакым Надежда Тимофееван лаштыкыштыже верештым. Надежда ешыж дене «Всей семьёй» Российысе проектыш ушнен, пелашыже да йоча-шамычше дене тӱрлӧ заданий-влакым шуктат. Проект кышкарыште пайрем мелнам тудо шке аваже дене пырля ямдылен. Видеошто икшыве-влакын ковашт воктене чӱчкымышт моткоч келшыш! А коҥга мелнаже могай сымыстарыше!
Таче ме тыланда Надежда Тимофееван аваже нерген серышыжым лудаш темлена.
Авам – Корнилова Лидия Васильевна. Тудо Юлсер кундем Кӱшыл Азьялеш шочын-кушкын. Кызыт сулен налме канышыште. Ялысе суртышто шкетын ила гынат, яра ок кий. Шошо гыч шыже марте пошкудо Татарстан кундемыш пашаш коштеш, теплицыште тырша. Тушто мӧрым ачалат, погат, ковыштам шындат, сомлат, тӱрлӧ мланде пашам ыштат. Тыгодым мӧҥгыштат чыла ыштен шукта, пакчасаскам, пеледышым ончен кушта. Телымат яра ок шинче, эре пашам ышта, носким, пижергым пидеш.
Авай пеш ондак пелаш деч посна кодын. Туге гынат, кум йочам ончен куштен, йолӱмбак шогалтен, чын илыш-корныш луктын. Шке йочам ончен куштымеке, нунын мӧҥго гыч кайымекышт, авай кум йочам ончаш налын. Чыланыштым шке икшыве семынак ончен куштен. Кызыт чыланат ешан улыт, а авай – кандаш уныкан кова. Кажне каныш кечын чыланат ялыш ава деке вашкена. Тудо эре тамле кочкышым ыштен вашлиеш, мелнам кӱэштеш, коҥга шӱрым шолтен ямдыла. Мелнаже умшаштет шула – тынар пушкыдо! Ыштыме кочкышыжо тудын эн тамле!
Молан мелнат тыгай тамле пушкыдо пушкыдо лиеш манын йодынам икана. Мелнажым тудо эре торык вӱд дене луга. Ончыч, вольыкым ончымо годым, ушкална лийын, торык вӱд лийын. Кызытше муаш неле, вет ялыште ик-кок ушкалым веле ончат. Но авайлан пошкудо-шамыч ямдылен пуат. Сандене мелнаже тугаяк тамле да пушкыдо. Мелна деч посна тӱрло когыльым, перемечым кӱэштеш. Чылажат пеш тамле.
Авам моткоч марий шӱлышан. Тудо калыкнан йӱлажыс сайын пала, мыланна каласкала да уныкаже-шамычымат туныктен шога. Мутлан, теве ӱярня пайрем годым тиде пайрем йӱлам ончыч кузе эртареныт да мом ыштеныт, каласкален. Чыла умылтарен. Шочшыжланат, уныкажланат мелнам ышташ туныкта. Мыланна чыла оҥай, ум пален налаш моткоч келша.
Авам тыгак тӱрлаш пеш йӧрата. Самырыкше годым шуко тӱрлен, кызыт тазалыкше вашталтмылан кӧра ок тӱрлӧ. Шуко кидпашаже Волжск оласе тоштерыште аралалтеш. Теве фотошто чиен шогымо марий тувыржымат шке тӱрлен. Пеледыш пайремыш марий вургем дене коштеш, кеч-могай пайрем годым муралтенат, кушталтенат пуэн кертеш.
Ме авана деч илышлан куанаш, пашаче да чолга лияш, шочмо йылмынам да йӱланам пагалаш, ваш келшен да пагален илаш тунемына.