Кайык муро чоным куандара
Автор — Зинаида Поликарпова.
Пӱртӱсым, кайыкым, пеледышым, пушеҥгым, тӱрлӧ экзотический кушкылым моткоч йӧратем…Кеч-кушто лиям: кеч тораште теҥыз воктене, каныме верыште, кеч сад-пакчаште, кеч паркыш лектын коштмо годым, пӱртӱсыштӧ мо ышталтмым ончаш, шымлаш йӧратем.
Телым кайыклан кочкышым муаш нелырак, сандене нунылан полшыман. Да тыгак ышталтеш. Мемнан илыме верна воктене чодыра. Калык каныш годым тушко лектеш канаш, яндар юж дене шӱлаш, ече дене кошташ. Тыгак ече дене, куштылго атлетике да моло тӱрлӧ ӱчашымаш эртаралтыт.
Чодыра дене эртет, кумыл нӧлтеш, чон куана да кана. Могай гына пӱртӱс сӱретым от уж!.. А могай гына кормушко уке!!! Кажне канаш лекше айдеме кечшудым, шӱрашым але вес кайык кочкышым, урлан пӱкшым пеленже налеш!
Меат тыгак ыштышна. Кӱсен тич кайыклан сийым оптышна да чодыра велыш ошкылна. Ончылнына тӱрлӧ-тӱрлӧ кормушко-влак кояш тӱҥалыч…
Кӱсеныште улшо сийнам верын верын меат пыштышна. Тысе кайык-влак калык дек тунемше улыт, витне, вуй ӱмбалне чоҥештылыт, огыт лӱд… Могай гына кайык уке, лач ӧршым гына ужаш ыш перне ала-молан, чаманаш веле кодеш…
Чодыраште веле огыл, садыштат кайык муро чоным куандара… Койышыштым, чогыматымыштым ончен, колышт шинчетат, чыла ойгет, нойымет мондет. Сандене меат телым мийымына годым, пукшена кайыкнам. Мотор «кочмо верым» сакышна. Кеҥежым сылне мурышт дене куандарат ман ӱшанен кодам, шырчык омарташкынат у ешым вучена.
