Юзо мурылан юзо вер лийже
«Ава ден йоча-влак калык вургем дене» тӱнямбал конкурсын «Малтыме муро» номинацийыштыже Провой вел Выльыпсола ялыште илыше Екатерина Николаева сеҥыше-влак радамыш лектын. Клипыште Екатерина изи ӱдыржылан малтыме мурым мура.
Тиде клипым самырык авалан фотограф, видеограф Екатерина Михайлова войзаш полшен. Теве кузерак шарналта тудо пырля ыштыме паша нерген:
— Эн ончыч Екатерина Николаева мыланем «Малтыме муро» конкурсыш ушнаш кумылан улмыж нерген возен. Ме шуко шоненна, клип могай сынан лийшаш. Онченна ондакысе участник-влакын пашаштым. Шуко тӱрлӧ идей лийын. Тоштерыштат войзаш шоненна, вара уремыштат…
Мый фотограф, видеограф улам, кундемнан тӱрлӧ верыштыже лиедаш логалеш. Ик эн йӧратыме вер – Провой кундем Чуваш-Отары ял. Кунам миенам тушко черетан съемкыш, мый умыленам: тиде юзо клиплан тыште эн келшыше вер.
Мурылан йӱкым посна возенна. Мурым уремыштак возена ыле гын, машина кудалме, мардеж, пий оптымо, моло йӱк-влак пурат ыле.
Йӱкым студийыште профессионал оборудованийыште пыштенна. Катя мурен шкеак. Монтажым ыштыме туге, тӱрвӧ тарванылмыже йӱк дене келшен толжо.
Клипын идейже шотышто теве мом ойлем: Екатерина мылам ӱмаште сеҥышын клипшым колтен. Тудым пӧртыштӧ войзымо. Тиде, очыни, тоштер лийын. Пӧртыштӧ команмелнам кӱэштыт, кова-влак мурым мурат. Мый тидым ужын, Чуваш-Отарысе тошто пӧртым вигак шарналтышым. Да, тушто тӱҥалаш лиеш манын шоналтенам. Вер тушто палыме, моткоч мотор, эсогыл телевидений, газет редакций-шамычат икмыняр гана миеныт.
Клипым ик каныш кечын сниматленна. Кече шичме деч иктаж кок шагат ончыч. Тидлан иктаж шагатат пеле жап каен. Мемнан пашанам жюри кӱкшын аклен. Тидлан ме моткоч куаненна.
— Екатерина, айста ынде тендан дене лишкырак палыме лийына. Могай кундемыште иледа? Фотограф лияш шонымаш кунам да кузе шочын? Оҥай да ойыртемалтше фото-влакым ышташ шӱлышым кушто налыда?
— Мый Звенигово олаште илем. Пашам ыштем республикын тӱрлӧ верыштыже: сӱаныш ӱжыт ма але вес пайремыш, студийыште я уремыште – чыла вережат сай фотом ышташ тыршем.
Фотограф лияш икымше гана декретыш кайыме годым кумыл лектын. Тиде 9 ий ончыч лийын. Тунам мый изи ӱдыремым войзенам. Кажне гана утларак да утларак тиде сомыл келшен. Жап эртымек палыме-шамыч шке икшывыштлан мотор фотом ышташ йодыныт, вара ава ден йоча-влакым пырля войзаш тӱҥалынам. Утларакшым еш-влак дене пашам ыштем.
Кушто шӱлышым налам? Тудо кӧргыштем. Мый дечем ойыртемалтше фотом ышташ йодыт. Мый вигак вуйыштем тӱрлӧ вариантым кычалам. Мутлан, имньым ашныше-влак дене кутырен келшем. Имне вӱта йыр коштына, имне дене фотом ыштена.
Звенигово районышто шуко мотор вер, Юл серат юзо вер манын кертам. Эн чот пӱртӱсыштӧ войзаш йӧратем, тушто кечын волгыдыж дене модаш лиеш. Игече начар годым студийыштат пашам ыштем. Мыланем келша шке сомылем.
— Тау, Екатерина, вашмутым пуымыланда. Пашаштыда шуко-шуко сеҥымашым тыланена!
Екатерина НИКОЛАЕВА, самырык ава, «Ава да йоча-влак калык вургем дене» конкурсышто сеҥыше:
— Пеш шуко эмоций, пеш куаненам, тӱнямбалысе конкурсышто икымше гана сеҥенам, клипемжат икымше. 15 ноябрьыште Москошко награжденийыш каяш шонем.
Шке нергенем ойлаш гын, шочынам Звениговский район Поянсолаште, илем Выльыпсола ялыште. Клипыште войзымо малтыме мурым ӱдыремлан огеш мале гын, вара муралтенат колтем.
