Еш — тиде ик команде
28 мартыште кундемыштына Шуко шочшан ешын кечыжым палемдат.
Марий Элыштына шуко шочшан 13 тӱжем наре еш уло. Нунын кокла гыч иктыже — Оршанке районышто илыше Козловмыт еш.
Татьяна ден Николайын ушнымыштлан тений 20 ий лиеш. Ешыште ныл икшыве кушкеш.
Теве тыгерак ойла шке ешыже нерген Татьяна Козлова:
— Мый Оршанке педколледжыште тунемынам. Икана пырля тунемме йолташ ӱдыр-влак дене Кугу Ӧрша дискотекыш толынна. Тыште пелашем дене палыме лийынна.
Мут толмашеш, мемнан группо гыч Кугу Ӧршашке вич ӱдыр марлан толынна. Кызыт еш-влак ден келшена.
Ешыштына ныл йоча кушкеш:
Софья кугурак ӱдырна школым сайын тунем пытарен, Новосибирск кугыжаныш университетыш геолого-геофизический факультетыш тунемаш пурен.
Радимир эргына Оршанке школын 9 классыште тунемеш. Тудо футболлан шӱман. Йошкар-оласе СШОР-ын воспитанникше, тренировкыш да тӱрлӧ турнирыш коштеш. Кызыт Саранскышке арнялан модаш каен.
Дарина йочасадыш коштеш. Сӱретлаш да кушташ, мурым мураш йӧрата. Оршанкысе йоча усталык рӱдерыш коштеш.
Лёва эргына ик ий да ныл тылзаш. Кочажын лӱмжым пуэнна, садлан ешыштына кок Лев Николаевич улыт.
Еш — тиде ик команде, тушто таҥасъеҥ лийшаш огыл: ик велышкыла ончыман, тунам чыла сай лиеш! Тыгак икте-весылан эҥертен да полшен шогыман … Кугурак — изираклан да мӧҥгешла.
Йоча-влакым ончен-куштымаштат ик семын ончыман.
Такшым, шкем кузе кучет, йоча-влакат тыгаяк койышан лийыт. Мутлан, мыйын пелашем ӱмыржӧ мучко эре ала-мом уым тунемеш: тӱрлӧ курсым, тренингым эрта. Садлан мый ом ӧр: икшывем-влакынат тиде шинчымаш кумылышт уло.
