«А ну-ка, ӱдыр-влак!»

Шукерте огыл Звенигово оласе тӱвыра пöртыштö «А ну-ка, ӱдыр-влак!» конкурс эртаралтын. Тиде конкурсын вич участникше гыч иктыже ‒ Нина Янгелова.

Нина Леонидовна — врач-дерматовенеролог, тыгак Звенигово район Красногорский посёлкысо эмлымверым вуйлата.

Конкурс нерген кумданрак эмлызе тыге каласкалыш:

‒ Тиде конкурс Россий Президент Владимир Путинын кӱштымыж почеш чыла регионышто эртаралтшаш. Мемнан кундемат öрдыжеш кодын огыл. Конкурс кум ужашлан шелалтын. Икымше этапыште видеовизитке гоч шке нерген палдарыман ыле. Кокымшо ужашыште паша вер нерген палдараш кӱлын. Ик кече жапыште могай сомылым шуктет, кушко коштат ‒ ончыктыман. Тыште коллегем-влаклан таум каласен кодыде ом керт. Красногорский эмлымверын пашаеҥже-влак кыртмен тыршеныт, калыклан былиным ончыктеныт, презентацийым ямдыленыт. Творческий шӱлышан номерым ямдылаш мыланем ешем полшен. Ачам гармонь дене шоктен, а мый кок шочшем дене такмак-влакым муренна.

Икымше верыш Звенигово оласе «Светлячок» йочасадын воспитательже Светлана Сергеевна Степанова лектын. Ынде тудо республик кӱкшытыштö Провой кундемын чапшым аралаш тӱҥалеш. А мый интернет-йӱклымаште сеҥышыш лектынам. Мыйын верч йӱклышö кажне айдемылан тауштем. Тиде мыланем моткоч шерге да кугу ак.

Тыгай конкурс-влак кӱлешан улыт, шонем. Конкурс жапыште ме шке мастарлыкнам веле огыл ончыктенна, а тыгак шке паша верна нерген каласкаленна. Тидыже шкешотан профориентаций паша. Тылеч посна ме творческий номер гоч шкем шуараш лийме йöн денат палдаренна, шонем.

Умбакыжат тыгай конкурсым эртараш кӱлеш!

Ну а ме, Унагудо-интернет журнал лӱм дене эше ик гана Нина Леонидовнам сеҥымаш дене саламлена да чыла сайым веле тыланена. Пашада вораҥын толжо!