Марий йомак-влакым онченат?

«Не Иван, или как приручить богатыря», «Чоткар», «Ирга» — чыла тиде самырык кинематографист Денис Шаблийын ямдылыме пашаже-влак улыт. Шукерте огыл «Марийские сказки» фильмым ямдыленыт да калыклан аклаш луктыныт. Тиде кечылаште фильмым республикнан районлаштыже ончаш лиеш. Мутлан, кокымшо июньышто Куженер, Шернур да Марий Турек посёлкыласе кинозалыште ончаш йӧн ыле. Шымше июнь марте Денис Шаблий шке йолташыже-влак дене вес районлашкат фильм дене миен шуэш (афише статья йымалне).

Денис Шаблий шке соцсетьысе лаштыкыштыже тыге палемда:

«Изи Денисын кугу шонымашыже таче шукталте! Вич ий тыршен ыштыме пашам коча-ковам Шернур посёлкысо кинотеатрыште ончен кертыч. Ийготыштлан кӧра нуно ты марте презентацийыш миен кертын огытыл, но таче (2 июнь 2025 ий) мый шочмо кундемышкем шке пашам ончыкташ конденам. Каласен кодыман, фильмыште кок геройын лÿмышт Любомир Михайлович ден Валентин Николаевич йоҥга. Нунын прототипышт кочам-влак улыт. Иктыже залыште шинчен ончен гын, весыже — вес тÿня гыч. Лишыл еҥем-влак пашам кÿкшын акленыт. Тидыже мылам эн шерге!».

Кӧ ты марте ончен, аклен шуктен огыл гын, Йошкар-Олаште июнь мучко «Синема Эл» кинотеатрыште ончаш йӧн уло.

4 июня :
9:30 — Медведево посёлко («Медведево» кинозал )
15:00 — Морко посёлко («Звездный» кинозал )

5 июня:
13:00 — Килемар посёлко («Сфера» кинотеатр)

6 июня:
17:00 — Козьмодемьянск ола(кинозал «Юнга»).

7 июня:
10:00 — Красногорский посёлко («Мир» кинотеатр)
14:00 — Волжск ола («Синема Эл»кинотеатр )
18:00 — Звенигово ола («Синема Эл» кинотеатр)