Вуйым шийын ит кошт, нал да ыште!
Интернет мыланна шуко пайдале йӧным пуа. Мутлан, тора родо дене видеойыҥгыр дене мутланаш лиеш але иктаж уверым вашкен гына ончалаш я кӱлеш ой-каҥашым муаш. Но пытартыш жапыште интернет тӱняште шуко удам ужаш логалеш. Теве шукерте огыл ик «увер» шинчамлан перныш. Мутлан, кеч-могай томаша годым тӱрлӧ вуйлатыше-влакым титаклаш вашкат: марий йылмым огыт туныкто, уремлаште лумым огыт шӱкӧ, ялыште куштырам жапыште огыт кораҥде да моло вуйшиймашым шке лаштыкышкышт вераҥдат да «полышым» йодыт.
Тыгай сынан «шонкалымаш» пытартыш жапыште чӱчкыдын койылалта.
Тыгодым мыйын возышо дене ик йодыш гына: «А тыйже мом ыштет?» Шочшет, уныкат дене марла мутланет? Ала клубышто я школышто иктаж марий мероприятийым эртараш полшет? Лумым эрыкташ иктаж амалкалче дене мутланен келшет?
Палем, шукыж годым договорым пеҥгыдемдаш ял советын оксаже огеш сите. Но тыгай годым вурседал шинчыман огыл, а тӱшка вий дене пашам вораҥдарен колтыман. Юмылан тау, южо вере еҥ-влак шке семын погынен, кутырен келшен, пашам пырля вораҥдарен колтат.
Марий калык йомеш манын чаҥым кырена. Калык такат «йомеш». Молан? Ончалза, кызыт уло ял дене вашла полшаш коштыт мо? Пайремым пырля эртарат мо? Уке. Кажныже шке семынже «илен кия». Тугеже эркын чыла йомын толеш: йылме, тӱвыра, фольклор.
Сандене кеч-могай пашам шке сурт гыч тӱҥалман. Пошкудо-влак дене кылым пеҥгыдемдыман, вашла полшаш тунемман. Умбакыже иктеш марий йӱла почеш пайремым эртарен колташ, кастене пырля погынен, кидпаша касым эртараш. Мом ышташ лиймым пеш кужун возгален шинчаш лиеш. А кӱлешыже тарванаш да ышташ.
Кости вате.
