Шочмо йылме ‒ чон поянлык
Таче Марий кугыжаныш университетыште этнокультур предметла дене олимпиаде эртаралтеш. Тушко район турышто ойыртемалтше, 9-11 класслаште тунемше 110 еҥ чумырген.
Ты радамыште Параньга район гыч Максим Лапинат лийын.
Максим марий йылме предмет дене шке шинчымашыжым терга. Тудо кумшо ий почела ты олимпиадыш толеш.
Шочмо йылме ден сылнымут дек рвезе изинек шӱман кушкын. Мöҥгыштыжат, школыштат, йолташ-влак денат эре марла кутыра, марий йылме деч ок вожыл.
Тӱҥалтыш класслаште икымше туныктышыжо Жанна Аркадьевна Попова, вара марий йылме ден литературым туныктышо Елена Николаевна Вараксина шӱмаҥденыт. Кызыт Галина Ивановна Антонова ты сомылым шукта.
Кызыт Максим 11 классыште тунемеш. Ончыкылык профессийжымат шочмо йылме денак кылдынеже, но чылажат ЕГЭ-м кучымо деч шога. Ончыч почеламутым возкален, «Ямде лий» газетыштат ятыр гана савыкталтын. «Марий юнкор» слётыштат лийын. Шке кумылын «Сылнымут шыже» литератур семинарышкат миен коштын.
Анастасия Сидорова тыгак шке жапыштыже участник радамыште лийын. А таче тудо олимпиадым эртараш полшышо-влак коклаште.
– 28 январьыште Марий кугыжаныш университетыште школлаште тунемше-влаклан этнокультур предметла дене республик кӱкшытан олимпиаде эртен. Тиде олимпиадыште мый волонтер сомылым шуктен шогенам. Икманаш, шке группо дене мероприятийым организоватлаш полшенна. Да тыгак эше пайремыште вӱдышӧ лийынна. Школ жап годым шкеат тыгай олимпиадыште вием тергенам. Лектышемат уло.
Школ пагытыште икымше олимпиадыш мийымем годым шӱм вургыжмаш да тургыжланымаш чонышто лийын. Шеҥгек ончалын, келге куан шижмаш чонем авалта, вет мыят ала-кунам тыгаяк лийынам.
Ну а ме сай лектышым веле тыланен кодена. Шочмо йылмынам аралыза, перегыза да аклыза!
Фотом Анастасия Сидорован архивше да МарГУ-н сайтше гыч налме.
