Театр — тиде…

27 мартыште Театрын тӱнямбалсе кечыже палемдалте. Тиде пайрем вашеш артист-влаклан икгай йодышым пуэнна. Нунын вашмутышт тыгайрак ыле:

М. Шкетан лӱмеш марий национальный драме театрын артистше МАРИНА Воронцова:

– Театр тыланда тиде мо?
– Театр – мыйын йӧратыме паша верем, тудо кокымшо мӧҥгӧ гай. Шукыж годым ме тыште кечыгут улына, репетироватлена, спектакльлан ямдылалтына, кочкына-йӱына, мӧҥгына малаш гына каена.
– Йӧратыме рольда уло мо?
– Роль ынде ятыр погынен. Кажне рольым чонем пыштен модашак тыршем. Тачысе кечылан йӧратыме роль семын палемден кертам: «Кеҥеж йӱд» спектакльыште Ольган образже, Юмынӱдыр, Пампалче, Салика, «Элнет» спектакльыште – Тамара!
– Артист профессийын могай нелылыкше уло?
– Артистын пашаже сцене гыч зрительный залыш моткоч куштылгын коеш. Но тиде паша лачак куштылгын койжо манын артист тушко мыняр вийым, жапым, моштымашыжым, уш-акылжым пышта. Нелылык кажне профессийыште уло. Мемнан пашаштынат тидын деч посна ок лий. Мутымат, мурымат ушышто кучыман, тунемын шогыман, кап-кылым да тазалыкым эскерыман, тӱрлӧ трюкланат ямде лийман. Адакшым тиде профессий моткоч шуко жапым налеш.
– Зритель семын театрын чӱчкыдын коштыда?
– Зритель семын кертмем семын кошташ тыршем, но чӱчкыдын огеш логал. Поснак Москосо спектакльыш але кумдан палыме мурызын концертыш кошташ йӧратем!

Марий самырык театрын артистше АНДРЕЙ АЛЕКСЕЕВ:
– Театр тыланда тиде мо?
– Театр – мыланем тиде кокымшо суртем. Молан манаш гын театрыште мый пел кече але южгунамже уло кече улам. Эшеже тиде юзо вер, кушто айдеме шонкалымашым шижын сеҥа.
– Йӧратыме рольда уло мо?
– Эн йӧратыме рольым ойырен ом керт. Чыла рольжат «шкемын» улыт манын сеҥем, но эн чот модаш вучымо роль-влакым ойырен кертам: Манилов «Похождение Чичикова или Мертвые души» спектакль гыч, Васька Пепел «На дне» спектакль гыч. Тиде кок тӱрлӧ персонажым уло кумылын эреак модам.
– Артист профессийын могай нелылыкше уло?
– Сай психологический состояний кÿлеш. Ме чыланат «русский психологический театр» негызеш пашам ыштена манаш лиеш. Сандене тыште кӧргӧ гыч тӱжвал сыныш луктын моштыман, да мастарлыкым таптыман.
– Зритель семын театрын чӱчкыдын коштыда?
– Вес театр-влакын постановкыштым эреак ончаш тыршем. Шукуж годым паша, репетицийлан кӧра ончаш огеш логал, но ожнысо спектакль-влакым Культура.ру сайтыште эреак ончем.

М. Шкетан лӱмеш марий национальный драме театрын артистше МАРИНА ТРУТНИКОВА:

— Театр — тыланда мо?
— Театр — тиде тыгай вер, кушко эре пӧртылмӧ шуэш.
— Эн йӧратыме роль.
— Тиде йодышлан вашешташ куштылгыжак огыл. Иктымат ойырен ом керт, вет тиде чын огыл. Кажне образыш чонетын могай-гынат ужашыжым пыштет.
— Артист профессийын могай нелылыкше уло?
— Эн кугу нелылык мыланем — жапым радамлаш. Еш, пелаш, паша да шке йӧратыме сомыл- чылажат шерге, но жапым муаш йӧсӧ.
— Зритель семын театрыш чӱчкыдын коштыда?
— Зритель семын кеч-кушкат кошташ йӧратем. Пытартыш тыгай мероприятий гыч Курчак театрысе «Юксалче» спектакльым палемден кертам. Моткоч келшен да кумылым налын.

М. Шкетан лӱмеш марий национальный драме театрын артистше КРИСТИНА ЛЕБЕДЕВА:

– Театр — тыланда мо?
— Эн тӱҥжо театр мыланем тиде йӧратыме паша верем, кокымшо мӧҥгем манын кертам. Молан манаш гын ме шуко жап театрыште эртарена, репетиций, спектакль…
– Эн йӧратыме рольда уло?
– Мый ом ойыркале роль-влакым. Кажныжым чоныш пыштен модаш тыршем. Кажне роль шке сынан, оҥай.
– Артист профессийын могай нелылыкше уло?
– Нелылык чыла вере уло, кеч-могай паша верымым налат гынат. Мемнан пашаштат тиде уло, текстым ушышто кучыман, музыкальный спектакль гын, муро влакым шарныман. Тыгак районлаш лектын коштмо годым икшыве-влакым нигӧ дене кодаш. Кастене репетиций але спектакль годым пырля пашаш коштыктем.
— Зритель семын театрыш чӱчкыдын коштыда?
— Зритель семын театрыш мый кошташ тыршемак. Тунам мый чон дене театрыште канем.

М. Шкетан лӱмеш марий национальный драме театрын артистше ГЕНРИХ ТИМИРЯЕВ:

– Театр — тыланда мо?
– Театр тиде пӱтынь илышем. Ме уло ӱмырнам тушто эртарена. Кеч корнышто улына гынат, мутлан, ме эре текстым тунемына, ушештарена.
– Эн йӧратыме рольда уло?
– Чыла рольжат йӧратыме улыт. Кажныже мыйын ик ужашем семын шотлем. Изи эпизод я кугу роль, чыла шӱм гоч колталтеш.
– Артист профессийын могай нелылыкше уло?
– Эн тӱҥжӧ жап чӱдылык. Рольым модмо годым эре шонем, кузе тудым пойдараш, кумданрак почын пуаш.
– Зритель семын театрыш чӱчкыдын коштыда?
– Зритель семын шагал спектакльыш кошталтеш. Палемдымем семын жап шагал. Идалыклан ик-кок гана тыгай мероприятийыш мияш йӧн лиеш гын, тудат пеш сай.