Олимпиада-Липа
Шошым лум шулен пыта веле, ял помыжалтеш. Трактор-влак шошо агалан ямдылалтыт, пасулаште мӱгырен кудалыштыт. Еҥ-шамыч кудывечыштым, уремым шӱк деч эрыктат, пакчаште мландым пушкыдемдат, йыраҥлаш пакчасаска нӧшмым ӱдат.
Теле гоч вӱташте шогышо вольык вашкерак эрыкыш, ужар олыкыш, лекнеже. Ушкал-влак эрден эрак ломыжаш тӱҥалыт. Почешышт шорык-влак йӱкым пуат.
Ялыште вольыкым кызыт шукын огыт ашне, шӧр-торыкым, шылым кевытыште налаш шулдынрак лектеш, маныт. Туге гынат ӱмыр мучко вольыкым ончен тунемше-влак ныл йолан йӧратыме йолташыштым ужалаш огыт вашке. Вет ялысе шӧр-торыкым кевытысе дене от вашталте. Адакшым вольыкым ончымаш — чон йодмо сомыл. Южо еҥ вӱташке лектешат, ушкалже дене мутлана, тупшым ниялта, але казан ушан шинчашкыже ончалын, ласкалыкым муэш.
Олыклаште шудо ужарген шуэшат, суртоза-влак вольыкым кӱтӱш колтат. Тыгодым шукынжо тидым йӱла почеш ыштат. У Торъял район Овалыж ялыште илыше Николай Сидоркин вольыкым кӱтӱш лукмо йӱла нерген тыгерак каласкала:
– Кӱтӱш икымше гана лукмо деч ончыч ушкалым мушкына, а почшым гын – шовын дене. Эрдене сортам чӱктен, Юмылан пелештена: «Сай серлагышым пуэн шого, аралтышым ыште, кузе эрдене вӱта гыч луктын колтена, кастенат вӱташкак толжо! Шӧран лийже!»
Кӱтӱш шертне (верба) воштыр дене ниялтен ужатен колтена. Кугече пайрем деч ик арня ончычсо Кичке кечын юмылукыш у воштырым керына, а тоштыжым вӱта омса вак керына. Вара тиде воштыр дене ужатена. Мыйын ушкалем 2014 ийыште шочын, Олимпиаде годым, садлан лӱмжӧ тудын – Олимпиада-Липа!
