Тыгай ешыште шочаш — пиал!

«Мый пиалан улам!» — кычкыралме шуэш. Да, мый, чынак, пиалан улам, молан манаш гын эн мотор, поян ешыште шочынам. А поянлыкше – еш коклаште йӧратымашын да ласкалыкын озаланымыже. Эн пеҥгыде кыл еш коклаште веле.
Ешыштем визытын улына: авай, ачай, акай, изай да мый. Мемнан y пӧртыштына ачай оза —  Эдуард Иванович Михайлов. Тудо Буймо ял шотан илемын вуйлатышыже. Тиде пеш йӧсӧ паша, вет тынар шуко калык ден пашам сайын ыштыман, нунылан полшыман, илемым радамыште кучыман. Кажне кечын ачам Буймо ялышке пашашке лектын кая, мӧҥгына, Пелемеш ялышке, южгунам кастене веле толын шуэш. Мемнан илем коклаште ачай могай гына кугу да кӱлешан пашам ыштен огыл! Ачам дене мый пеш кугешнем. Мылам тыге чучеш, пуйто тыгай ача молын иктынат уке.

Мыйын авам, Михайлова Марина Семёновна, тÿҥалтыш класс-влакым туныкта. Школышто икшыве шукак огыл, но кызытсе жапыште туныктышо паша садиктак йӧсӧ. Мыйын шонымаште, тиде эн неле профессий, вет нимом моштыдымо, палыдыме икшыве-влакым возаш, лудаш да шотлаш туныктыман. Тидын деч посна моло тÿрлӧ пашам шуктыман: мероприятий, концерт, поход, шымлымаш полша, ача-ава-влак дене кылым кучымаш… Кажне туныктышо пагалымашым сула. Акам Ижевск олаште, а изам Нижнекамскыште шке ешыж дене илат, но ме жапым утларак пырля эртараш тыршена. Кеҥежым нуно мыланна мÿкшотарыште полшаш толыт, пакча-садыште жапым эртарат, вет ялыште сомыл нигунам ок пыте. Кызыт мӧҥгыштӧ ме кумытын илена: авай, ачай да мый. Ача-ава кастене паша гыч толыт, шукыж годым мый эн вара толам. Телым уремыште утыжым йÿштӧ огыл гын, пырля ече дене мунчалташ каена, кеҥежым кечыгут мÿкшотарыште тыршена. Ешемын полышыжым эреак шижам: тÿрлӧ-тӱрлӧ йодышемлан вашмутым пуэн кертыт, иктаж-мо кÿлеш гын, кондат але налыт, мылам ӱшанат. Мый тений индешымше классым тунем пытарем, экзамен-влаклан ямдылалтман. Тидым мыйын авам-ачам пеш сайын умылат, мылам эн ÿшанле эҥертыш улыт. Нуно палат – мый ушан да мастар ÿдыр улам. Ме канашат она мондо: иктаж олаш миен толына, у верлашке коштына. Ава-ача ден пырля мылам нигунам йокрок огыл.

Мемнан ешыште тÿҥ правил уло – йӧраташ, пагалаш, икте-весым куандараш да полшен шогаш. Вет еш – тиде эн шергакан, мо айдемын илышыштыже уло. Мыйын шонымаште,  тыгай йӧратыме ешыште шочаш – кугу пиал. Мый кугешнем эн лишыл еҥем-влак дене да нуным пеш чот йӧратем.

Михайлова Ирина.
Тататрстан кундем
Агрыз район, Буймо школ.
Туныктышо — Эмма Николаевна Ильина.