Ӱдыр але эрге?
Интернет тӱням кеч изиш да эскереда гын «гендер-пати» мутым колында, докан. Але кузе маналтмыжым огыда пале гынат, кеч ик гана да тыгай пайрем гыч видеом ужында.
А теве кодшо арнян тыгай пайремым Шернур посёлкышто эртареныт. Но ик кугу ойыртем уло! Тудо марий сынан лийын!
Кузе тыгай пайремым ышташ шонымаш лектын? Мыняр жап да вий тидлан ойыралтын туныктышо, поэтессе, кок шочшан ава Татьяна Токтарова деч пален налына:
‒ Мый интернетыште «шинчыше» айдеме улам. Шуко блогерым ончем. Поян блогер-влак калыкым поген, «гендер-пати» пайремым эртарат. Тушко уна-влак пöлек дене толыт, тӱрлö фотокумдык ямдылалтеш, сийым погат да тулеч молат.
Мыйынат нуным ончен, тыгай пайремым эртараш шонымаш шочын. Но! Марий шӱлышаным. Меат нужна огынал, пайремым эртараен колташ ситышын оксана уло. Да такшым ончалаш гын, окса толеш да кая, а тыгай событий историеш возалт кодеш. Пелашемат ты пайремым эртраш тореш лийын огыл. Тыге ме пашалан ямдылалташ тӱҥалынна.
Эркын шийвундым погымо, тӱрлö идейым интернетыште кычалме, ончымо. Фотокумдыклан арвер-влакым наледыме. Вӱдышö дене кутырен келшенам, Дима Веденькиным йодынам. Икшыве-влаклан, шканем стилизоватлыме марий вургемым ямдыленам. Вара йолташ-влакым ӱжынам. Пöлеклан оксам огыл, а марий сийым кондаш йодынам. Шкеат марий сынан тортым пайремыш заказатленам. Жап шотым ончалаш гын, иктаж пел ий ямдылалтынна.
Йочан ӱдыр але эрге улмыжым палаш канде да кыне тӱсым кучылтыт. Тыштат мый шке шонымем семын ыштенам. Йошкарге ‒ вийым ончыкта, сандене эрге лийшашлыкым ончыкта манын ойыренам. Ошо ‒ ныжлгылык дене келшен толеш ‒ ӱдыр. Конфетти але тӱрло тӱсан шикшым кучылташ огыл манын, кугу коробка гыч гелиевый шарым лукмо.
Икшвын ӱдыр але эрге улмыжым пален налмеке, тӱрлö конкурсым ямдыленна. Мутлан, йочалан пукшымо пюрен тамжым пален налаш. Тыгак изирак йодыштмаш ыле: йочан шочмыжым кузе эше умылтараш лиеш. Икте, мутлан, ковышташте муыныт маныт гын, весым ‒ аист конден.
Шольым Моско гыч мотоцикл дене шке кудал толынам манын ойла ыле изиж годым. Лида кока Шошо пазар годым шошо вӱд дене толынам, сандене пайремыш кошташ йöратем манын воштыл каласкалыш. Мучашлан мужедме семын, пелёнкым кудалтенам.
Умбакыже вес йыжыҥ вуча, марий выпискылан кыртмен ямдылалтына.
