Пайрем сий (мыскара). Мария Илибаева
Йӧра, кочкыш-йӧрварым нумалын ситарет. Но тудыжо эше «сырье» веле. Тушечын кочкышым ӱстембаке шындаш йӧршым ыштыман. Пельменьлык шылым мыняре пӱтырет, мыняре руашым нӧштылат?! А салат-влакше — адак ушет кая! «Мимозаже», «ужга йымалже», кешыр, ковышта, олма гыч ямдылкалымыже… А тортым ыштымым ӱдырамашлан эн неле наказаньым шонен лукмо дене веле таҥастараш лиеш, шонем. Конешне, кевытыштат налаш лиеш ыле, но шке ыштыме содыки шке ыштымак — перкеле, мӱшкыр тореш кайымеш томыраш сита… эше утен кодеш.
Садыге, арня ончыч ямдылалташ тӱҥалме сомылым У ийым вашлийшаш водылан гына тӱрлӧ кугытан когыльо-влакым кӱэштме дене мучашлена. Тыгак аракам налме сомылат шуко ешыште — ӱдырамаш ӱмбалне. Вара, ӱстел йыр чумыргымеке, чаркаш темкален, уна-влаклан шуйкалыме пашаже гына пӧръеҥ кидыш кусна.
Сий кажне пайремлан чеслынак ямдылалтеш — тиде мемнан, Россий калыкын, йӱлаже, эн кугу палыже, тамгаже… Икманаш, роведмешке авызлаш да, куштен-тавен, пагарыште трамвуен, эше икмыняр пачаш ӱстел йыр шинчын кочкаш ситыже.
Но садак тиддеч варат утен кодеш. Вот саде утен кодшыжо — пайремлан ямдылалтме годым нойымем денат таҥастараш лийдыме наказанье. Мый вара шкемым Шкетанын «Шымлу ик подкинде» мыскаражын геройжо дене тӧр шижаш тӱҥалам. Йӧра, радамын лийже. Уна-влакын кочкын теммышт деч утен кодшо кочкышыжым холодильникыш темена, балконыш нумалына; писын пужлышыжым тунамак кочкын колташ тӧчена. Но кокымшо кечылан кочкын колтышо кокла гыч мый шкетын кодам. Ӱдырем балкон гыч черет дене нумалеш: кышкалаш кӱлеш, пужлаш тӱҥалын, манеш. Мый мыняр оксам оптымем, кевыт гыч кузе нумалмем, вара кузе ямдылымем шоналтен колтемат, чонешем тул пижеш, шинчавӱдем чыпчен лектеш — шкемым тунаре чаманем: «Кондо, — манам, — кышкалаш жалке, лучо кочкын колтем». Тыге — эрденат, кечывалымат, кастенат…
Балконышто пытарымек, холодильникыш куснена. Куснена маньым гынат, тудыжымат мыланемак кочман. Самырык-влакет мо нуно — олмам да монь пурышт тунемше тукым.
Холодильник кӧргыштӧ мо улмым да мыняре улмым ушем дене шотлем, вара, парням оптен, мыняр кечылан ситышашым палемдылам.
Шкетанын геройжо семынак шинча ончылно, тудын чуланыштыже, а мыйын холодильникыштем шинчыше кочкыш-йӧрвар чоҥештылаш тӱҥалеш. Шкетанын геройжо куваж деч вожыл-лӱдмылан тыге ыштен, а мый вет чылт шке кумылын. Икшыве-влак чарат гынат, шкеак!
Пыкше-пыкше кочкын пытарен шуктем, содыки оксам да пашавием мардежыш шым колто, но вара ик тылзе мучко ала мӱшкырыштӧ, ала пагарыште ала-могай азырен витараш тӱҥалеш. Тудыжымат чытем. И-и-и, мемнан калык ала-момат чытен тунемше! Но садикте сакый пайрем-влакым омак йӧрате.
