Марий ялыште — марий биатлон
24 январьыште Параньга район Ондропсолаште О.В.Полатов лӱмеш биатлон ден смешанный эстафета эртаралтын.
Тиде таҥасымаш нерген Инга Петрова тыгерак каласкалыш:
— Олег Валентинович Полатов тиде ялынак шочшыжо. Шке вуйжым Сирий мландыште пыштен. Тудын лӱмеш биатлоным 2018 ийыште эртараш тӱҥалыныт.
Смешанный эстафетын командыже 4 еҥан (3 рвезе да 1 ӱдыр). Тыглай ече дене огыл, сонарзе ече дене таҥасыман. Кок йырым куржыт, кажне йыр деч вара лӱйкалымаш: ончыч кийышыла, вара шогышыла. Лӱйкалат пневматический винтовке дене.
Тенийысе таҥасымаш поснак ойретмалтше манаш лиеш. Ончыч шке ял гына ушнен гын, тений вес ялла гыч шукын толыныт.
Таҥасымашке Матародо, Ермучаш, Осиял, Кугу Пумарий, Элпанур ялла гыч команде-влак ушненыт. Чылаже 10 команде лийын.
Сеҥыше-влак:
1 вер — «Картингист» команде. (Ондропсола)
2 вер — «Кугу Пумарий» команде.
3 вер — «Ондропсола молодёжь».
Сеҥыше команде-влак медаль, чаптанык да пӧлек дене палемдалтыныт.
Таче кече йӱштӧ лийын гынат, трассыште шокшо ыле. Таҥасымаш деч вара участник-влакым шокшо кочкыш, чай вучен.
Биатлон дене таҥасымаш тыгак 23 февраль да 8 март пайрем-влаклан пӧлеклатше эртаралтеш. 23 февральыште рвезе-влак , 8 мартыште ӱдыр-влак таҥасат.
Нине таҥысымаш-влакым Ондропсола тӱвыра пӧртын пашаеҥже-влак эртарат.
Фото-влакым Инга Петрова колтен.
