Кельмаксола школышто — семинар
Автор — Любовь Осинина
26 ноябрьыште Советский районысо Кельмаксола школышто «Школьное краеведение как фактор формирования патриотизма и функциональной грамотности» районысо семинар эртаралтын. Тушко марий йылме ден литературым, ИКН-ым да тӱҥалтыш класслаште туныктышо-влак погыненыт.
Школын коллективше мемнам пеш порын вашлие. Толмеке вигак школын тоштержым ончышна. Тудо экспонат-влаклан пеш поян.
Семинар жапыште кок урокышко пуренна. Ондак В.И.Зыринан 3-шо классыште «Телымсе кайык-влак» лӱман лудшаш урокым эртарымаштыже лийынна. Занятий пеш келшыш, поснак туныктышын урок жапыште яндар марий йылме дене мутланымыже.Йоча-влакынат кутырымаштышт акцент изиш веле палдырна. Тыгак 5-ше классыште «Марийская традиционная религия» темылан эртарыме ИКН урокышто лийым. Тыштат туныктышо пеш онайын каласкалыш.
Урок-влак деч вара марий концертым ончышна. Сцене гыч лач марий шомак веле йоҥгымо мемнам ӧрыктарыш да куандарыш. Йоча-влак дене туныктышо-влак, иктыш шогалын, сем деч посна пеш мотор марий мурым йонгалтарышт, да йоча-влак тӱшкан марий сем почеш тавалтышт.
