Йӱштӧ кугыза деке мияш ида ӧркане гына!
У ий каныш вашке эртен кая, шижынат от шукто. Теле каникул йоча-влаклан шарналт кодшо манын, Шернур вел Кукнур кундемыш Йӱштӧ кугыза деке каяш шонен пыштышна.
Тушко каяш шонымаш шыжымак шочын. Интернет полшымо дене октябрь мучаште Йӱштӧ кугызан илемыштыже верланыше пӧртым кок кечылан айлышна.
Палемдыме кечын родо-тукым да йолташна-влак дене, рӱж погынен, Шернур районыш тарванышна. Кукнур ялыш миен шумеке, лӱмын ыштыме пале-влак почеш кудална. Ял мучаште машина-влакым ужна. Моткоч шуко калык койо, пуйто телым Пеледыш пайремым ышташ тарваненыт. Кӧ ватрушко дене, кӧ издер але ече дене – чыланат Йӱштӧ кугызан илемышкыже вашкат.
Ме у идалыкын кокымшо кечынже миенна, лач тиде кечын тыште еҥ-влак поснак шукын ыльыч. У ий кож йыр изижге-кугужге пӧрдыт, Йӱштӧ кугыза дене войзалтыт, кугу лӱҥгалтыш дене лӱҥгалтат, курык гыч мунчалтат, чапле кок пачашан пӧртыш пурен-лектын коштыт…
Миен шумеке, ме эн ончыч айлыме пӧртым кычалаш тӱҥална. Тудыжо Йӱштӧ кочан суртшо деч тораште огыл верланен. Изиш кайымеке, тыгыде пӱнчерла коклаште йомакысе гай верыште кок пачашан пу дене ыштыме пӧртым ужна. Воктеныже – чапле беседке да монча.
Пӧртыш пурымеке, озаватым ужна, саламлалтна. Тудо могай арвер кушто верланымым ончыктышат, мемнам коден кайыш. Тыге ме кок кечылан ты суртышто оза лийна.
Пелен кондымо чесым авызлымеке, йыр улшо кумдыкым ончалаш кайышна. Уремыште пычкемышалтынат ыле. Йӱштӧ кугызан илемыштыже ик еҥат ыш кой. Эн ончыч ме лӱҥгалтыш дене лӱҥгалтенна, пу курыкышто мунчалтенна, вара кожла коклаш ошкылна.
Йӱдым чодыраште путырак оҥай. Мардеж пуалме дене кӱкшӧ пӱнчӧ-влак кочыртатат, тыгодым укшла гыч ночко лум камвозеш. Южгунамже ала-могай янлыкын йӱкшат пылышлан солна (ала ме шкеннам шке тыге лӱдыктенна). Телефоныштына фонарикым чӱктен, юзо корно дене вошт кайышна, вуверкуван сурт-печышкыже унала пурышна, маска вынемым ончална, сонарзын верыштыже пӱгыльмӧ дене лӱйылтна. Вара кугу курык гыч ватрушко дене мунчалтышна.
Тыге икымше кече шиждеак эртен кайыш.
Эрлашыжым эрден эрак кынелын, мемнан кокла гыч икмыняр еҥ ече дене мунчалташ кайыш. Ечым ты пӧртынак озаже-влак канаш толшо-шамычлан лӱмынак налын шогалтеныт. Тидыже мемнам путырак куандарыш.
Эр кочкышым ыштен, ме чыланат Йӱштӧ кугыза деке кайышна. Юзо корнышто йомак герой-влакым вашлияш шонымаш дене адакат кожлаш пурышна. Кӱкшӧ пӱнчӧ кокласе вияш корно мемнам юзо верлаш намийыш, вуверкува, сонарзе, маска дене палымым ыштыш. Тиде гана волгыдышто ме чыла сайын ончал савырнышна, войзалтна. Йоча-влаклан сонарзын верыштыже утларак келшыш, вет тушто нуно пикш, пычал дене лӱйылтыныт, шке сонарзе мастарлыкыштым тергеныт.
Кечывалланрак ме уэш Йӱштӧ кугызан суртшо воктеке миен лекна, но ты кечын илемын озаже ыш кой, вашке лектеш манме шоктыш гынат. Икмыняр жап вучымеке, мӧҥгӧ каяш тарванышна. Кок кече пӱртӱс лоҥгаште эртарыме жап икшывына-влакым сайынак нойыктарен.
Йӱштӧ кочай дене ик фотомат ыштен огынал, тиде кумылым изишак волтыш гынат, шочмо верышкына куаныше кудална. Икшывына-влакын ушыштышт телымсе йомак эше шуко жаплан шарналт кодеш.
Йӱштӧ кочайын илемыштыже канаш толшо-влаклан мом темлат?
Чыланат палат, очыни, Йӱштӧ кочай деке миен толаш ончылгоч возалтман, тыге юзо корно дене каен, тыланда интерактив программым темлат. Но возалтын шуктен огыдал гын, ида ойгыро, тушко чыланыштым пуртат. Лач изиш оксам гына тӱлыман.
Группо деч посна шке еш дене миен, тушто мом ышташ лиеш?
Ончылгоч возалтше семынак, юзо корно дене эрташ (интерактив программе деч посна), илем йыр кошташ, курык гыч мунчалташ, лӱҥгалтыш дене лӱҥгалташ, Йӱштӧ кочайлан почеламутым лудаш лиеш. Активный канышым йӧратыше-влакым снегоход дене коштыктат, изи имне Йӱштӧ кугызан суртшо йыр кумылан-влакым тер дене шупшыкта. Кугу курык вуйышто шокшо чайым, кофем темлат, туштак ватрушко-шамычым айлаш лиеш. Кок пачашан чапле пӧртыштӧ пӧлек-влакым налаш, тыгак кидмастар-влакын ончерыштым ончалаш темлат. Икманаш, сайын, пайдалын каналташ тыште чыла йӧн ышталтын, мияш гына ида ӧркане!