Марла модаш лиеш!

Йоча-влак телефонышто тӱрлӧ модыш-влакым муыт, виртуальный тӱняште лияш йӧратат. Тиде кумылыштым ынде чараш огешат лий дыр. Ала огешат кӱл? Тек модыт! Мыланна лач уда ден сайжым ойыраш туныктыман. Мутлан, икшыве-влак модшыла уш-акылым пойдарат гын, а эше йылмым тунемын кертыт гын, мо удаже?

Теве шукерте огыл Бурятийысе специалист-шамыч йоча-влаклан «Сокровище нации» мобильный модышым ыштеныт. Тиде модыш российысе калык-влакын тӱвыра поянлыкыштым ончыкта, йылмышт дене палдара. Чылаже модышыш 30 йылме пурталтын. Келшыше йылмым «чӱкташ» гын, ойырымо персонаж (рвезе але ӱдыр) шкеак ты калыкын ойыртемалтше вургемжым «чия», тыгак йыр улшо сӱрет посна регионын сынжым ончыктышо лиеш.

«Сокровище нации» модыш 1 гыч 10 марте шотлаш, тӱс-влакым да предметын тӱрлӧ ойыртемжым (изи, кугу, лопка да т.м) палаш, чылажымат шочмо йылме дене ойлен мошташ туныкта.

Аркадий Муниев, «Сокровище нации» проектым вуйлатыше:

– Тиде модышым ышташ шонымаш «яра вереш» лекын огыл. Ме шкеат ача-ава улына. Йочалан шочмо йылмым туныктымо йодыш мемнамат моткоч тургыжландара. Школышто йылме урок уло гынат, йочалан модмыла тунемаш куштылгырак.

Проектым ышташ манын, ме Россий регионласе тӱвыра министерствылаш йодмаш дене лектынна, полышым йодынна. Тыге калык вурем ойыртемым рашемденна, а посна кундемласе диктор-влак мыланна кӱлешан мут-влакым йӱкаҥден пуэныт.

Аркадий Муниевын палемдымыж почеш, таче кечылан модыш дене чылаже 25 тӱжем еҥ пайдалана. Тылеч посна лишыл пагытыште разработчик-шамыч эше вес модышым ышташ шонат. Тудо ешыште, еҥ коклаште мутланыме годым кучылтмо ойсавыртыш-влакым тунемаш полша, тыге посна йылме дене йочан мутвундыжым пойдара.

Модышым тыште муаш лиеш:

Скачай и играй прямо сейчас! (xn—-7sbbf4adaj5aebxk4fwb.xn--p1ai)