Марий Тиште пайремыште

10 декабрь – Марий Тиште кече. Тудо М.Шкетан лӱмеш Марий кугыжаныш драме театрыште кумдан эртыш.
Эн ончыч Марий Эл Республикын калык сӱретчыже Иван Ямбердов тамга нерген мастер-классым эртарыш. Кузе тамга шочмым, а тамга гыч мут кузе лиймым умылтарыш. Иван Михайлович тыгак мутышто, тӱрыштӧ шылтыме тамгам муаш лийме нерген каласкалыш.
Умбакыже «Марий тӱр рӱдерын» вуйлатышыже Ираида Степанова тӱр тӱня дене палдарыш.

Тиде кечын театрын фойештыже Россий писатель ушемын Марий Элысе пӧлкаже «Йӧратем, Россий Элем!» сылнымут-сылнысем шагатым эртарен. Тушто писатель ушемын еҥже-влак сылнымут пашашт дене палдареныт. А театрын залыштыже «О, мӱкшава гай поро шочмо йылме» конкурс иктешлалтын. «Ямде лий» ден пырля лийын, шижса сылнымутын вийым» усталык шагат эртаралтын. Тудын кышкарыште Христина Александрован «Чонемын шолып семже» книга презентацийже эртыш. Тыгак «Ший памаш» сылнымут фонд дене пырля «Ямде лий» газет «Рвезе йӱк» конкурсым иктешлен. З.Е.Яковлева лӱмеш премийым У Торъял район Токтарсола школын тунемшыже Родион Небогатиков налын. Антонов Ивук лӱмеш премий дене Волжский район Кугу Корамас школын тунемшыже Анастасия Михайлова палемдалтын. В.Исенеков лӱмеш премийым Морко район Арын школын «Сескем» кружокшо (вулатыше – О.А.Васильева) сеҥен налын. «Почетан юнкор» лӱм дене Николай Золотарев палемдалтын.

«Мунло» модмаш

Черетан «Мунло» интеллектуал модмаш тений икымше гана регион-влак кокласе кӱкшытыштӧ лийын. Тушко Кужэҥер, У Торъял, Морко, Волжский, Параньга районла, Россий писатель ушемын Марий Элысе пӧлкажын командыже, Киров кундем да Йошкар-Ола гыч команде-влак ушненыт. «Мунло» модмаш 3 тур гыч шога: 1-ше турышто марий сылнымут, писатель-влак нерген йодыш-влак улыт, 2-шо турышто — марий калыкын историйже нерген, а кумшо турышто кажне командын вуйлатышыже-влак таҥасеныт. Вер тыге пайлалтын: 3-шо верыш Писатель ушемын командыже лектын, 2-шо верым Куженер районысо «Чумбылат» команде сеҥен, 1-ше верым Морко районысо «Чолпан» команде налын.

Пайрем концертыште

Пайремыш толшо-влакым Марий Элысе Виктер Председательын икымше алмаштышыже Михаил Зиновьевич Васютин саламлен, туныктышо-влаклан Марий Эл вуйлатышын таумутшым кучыктен: Советский посёлкысо «Теремок» йочасадын туныктышыжо Галина Яковлевна Александровалан, Йошкар-Оласе 27-ше номеран школын пашаеҥже Татьяна Ивановна Васильевалан, Волжский район Сотнур школын туныктышыжо Надежда Николаевна Евдокимовалан, Юлсер кундем Помар школышто тыршыше Наталья Ивановна Яковлевалан, Карай школын пашаеҥже Эльвира Вячеславовна Васильевалан.

Марий Элысе тӱвыра, печать да калык-влакын пашашт шотышто министрын алмаштышыже Игорь Геннадьевич Садовин В.Васильев лӱмеш Йылмым, сылнымутым да историйым шымлыше марий институтын вуйлатышын алмаштышыже Галина Алексеевна Эрциковалан Марий Элысе Тӱвыра министерствын Почетан грамотыжым кучыктен. Тыгак Игорь Геннадьевич Калыкле сымыктыш гимназийын марий йылмым туныктышыжо-влак Эльвира Владимировна Петрова ден Валентина Ивановна Тимофеевам, Йошкар-Олан тӱҥ онаеҥже Юрий Дмитриевич Тушнурцевым Марий Элысе Тӱвыра министерствын таумутшо дене палемден.

Марий Элысе Туныктыш да шанче министр Лариса Анатольевна Ревуцкая погынышо уна-влакым Тиште кече пайрем дене саламлен. Тудо Кужэҥер район Шӱдымарий школышто марий йылмым да литературым туныктышо Маргарита Николаевна Савельевалан, Руш Шой школын туныктышыжо Серафима Арсентьевна Ефремовалан Россий Федерацийысе Просвещений министерствын Почётан грамотыжым кучыктен. Марий Оньыжа Эдуард Васильевич Александров Марий Элын калык артистше Вячеслав Тимофеевич Созоновлан «Калык верч тыршымаш» чап тамгам кучыктен.

«Марла чын возена» тӱшкан возымо диктантым Марий кугыжаныш университетысе Калыкле тӱвыра да тӱвыра кокласе кыл институтын директоржо Родион Иванович Чузаев иктешлен.
Марий Тиште кечылан пӧлеклалтше пайрем концертыште В.Васильев лӱмеш Йылмым, сылнымутым да историйым шымлыше марий институтын вуйлатышыже Людмила Яковлевна Григорьева ты кече дене саламлен. Сергей Рахманиновын «Сирень» романс текстым кусарыме шотышто Республикысе конкурсым иктешлен. 1-ше вер дене Марий Элын калык поэтше Геннадий Леонидович Сабанцев, Россий писатель ушемын Марий Элысе пӧлкажым вуйлатышыже Светлана Дмитриевна Архипова, Волжский район Помар тӱвыра пӧртын вӱдышӧ методистше Татьяна Геннадьевна Иванова палемдалтыныт.

«Шочмо кундем-чон пӱрымашем» регион-влак кокласе краеведений конкурсышто сеҥыше-влак: «Шочмо вер эн чевер» номинацийыште – Елизавета Исламова (Татарстан), «Нунын ден кугешнена» номинацийыште – Алина Милютина.

Марий Тиште кечылан пӧлеклалтше концертым сӧрастареныт: Россий Федерацийын сулло артистше-влак Зоя Берникова, Иван Смирнов, Марий Элын калык артистше Вячеслав Созонов, «Марий кундем» калык семӱзгар ансамбль.