Марий Элын шочшыжо — тале скульптор
Марий Элыште шочын-кушшо Владимир Алманов шукерте огыл Череповец олаште эртаралтше «Быстрая Пила» фестивальыште сеҥышыш лектын. Конкурс годым скульптор-влак, пила дене ийым пӱчкеден, тӱрлӧ фигурым ыштеныт. Владимир шулдырым шарен шогалше чолга агытаным ыштен да ты пашажым «На заре» манын лӱмден. Конкурсышто пашам шукташ 90 минут пуалтын, но В.Алмановын агытанже 60 минут жапыште шулдыржым шаралтен.
– Пандемийлан кӧра чыланат пеле малыше, вийдыме лийын пытенна. Шке скульптуремым черым сеҥен лектын, у эрыкан илышыш вончымо шонымаш дене ыштенам. Эр ӱжара сай да волгыдо илыш тӱҥалмым ончыкта. Агытан кумда шулдыржым шаралтыже, еҥ-влакым угыч помыжалтарыже, нунылан илыш куатым пуыжо! – мане шке пашаже нерген Владимир.
В.Алманов 1980 ийыште Курыкмарий район Шайыл Пӧртныр ялыште шочын. 10 ияшыж годым Йошкар-Оласе президент школ-интернатыште тунемаш тӱҥалын. Вара Йошкар-Оласе сымыктыш училищыште шинчымашым поген. Ачаже рвезым изинек сӱретче лияш кумылаҥден улмаш. Но Владимир ты сомыл деч чотрак пум пӱчкедаш йӧратен. Сандене Марий Элым коден, Моско область Сергиев-Посад район Богородский посёлкысо институтыш тунемаш пурен, тыште пу гыч пӱчкедыме мастарлыкшым вияҥден.
Кидмастар тӱрлӧ конкурсышто таҥаса, шуко гана писын пӱчкеден моштымым тергыше тӱнямбал чемпионатыштат лийын. Шукерте огыл Москошто эртаралтше «Лёд и снег» фестивальыште лийын.
– Марий Элын чапшым аралаш мыланем – куан. Поснак чонлан сайын чучеш, кунам шочмо кундемыштем шочын-кушшо вес марий-влак толыт, пелештат. Ты ганат фестиваль годым мый декем икмыняр еҥ тольо, эсогыл ик ӱдырамаш шке кидше дене ыштыме курчакым пӧлеклен кодыш, — каласкалыш Владимир.
