Вургемым марий тӱр дене сылнештара
Эше икмыняр ий ончыч марий тувырым еҥ-влак пайремыш гына чиеныт гын, пытартыш жапыште марий тӱран вургемым чиен лекше-влакым чӱчкыдынрак ужаш лиеш. Концертыш ма, театрыш але унала кайыме годым марий вургем калыкым утыр сылнештара.
Татарстан кундемысе Набережные Челны олаште илыше Марина Ахмадуллова мотор вургемым ятыр ий урга. Шукерте огыл самырык ургызо марий тӱрым тӱрлаш тунемын, садлан вургем коллекцийже ынде марий сынан тувыр-влак дене пойдаралтын. Тылеч посна Марина марий тамга-влакым тӱрлӧ арверыш келыштара.
– Марина, ургызо лият манын изинек паленат?
– Ургызо профессийыш вучыдымын логальым. Школ деч вара институтыш тунемаш пураш шоненам, но кертын омыл. Тунам акам портнойлан каяш темлен. Мый изинекак тӱрлӧ арверым ышташ, бисер дене кидшолым пидаш йӧратенам. Тылеч посна театральный школышто тунемынам, сценысе костюм-влакым эре йӧратен онченам.
Диплом пашам моло-влак дене таҥастарымаште нелырак лийын, туге гынат тудым сайын араленам, училищым йошкар диплом дене пытаренам. Тунем лекмеке ургымо ательеште пашам ыштенам, а вара заказ почеш вургемым ургаш тӱҥалынам.
Пайремыш чиен лекме мотор тувыр-влакым эреак йӧратенам. Садлан мыланем сӱан тувырым, тӱрлӧ пайремлан келшыше (мутлан, выпускнойлан) платье-влакым, корсетым ургаш утларак келша. Вургемым моторым ышташ, тунамак тушко марий тӱрым пурташ тыршем.
– Вургемыш марий тӱрым ешараш мо таратен?
Марий тӱрым тӱрлаш ончычак шонен пыштенам, но тунемме курсым нигуштат муын омыл. Ача-авам коктынат марий улыт, сандене шке калыкын йӱлажым да тӱвыражым палаш тыршенам.
Кок ий ончыч ӱдырем мемнан оласе марий-влакын общиныштын Рушарня школышкышт кошташ тӱҥалын. Тунам мый дечем костюм-влакым ургаш йодыныт. Тиде йодмашым шукташ шкаланемат оҥай лийын. Изиш жап эртымеке, Интернетыште кидмастар Надежда Акиеван марий тӱрым тӱрлаш туныктымо онлайн-курсыжым муынам да тунемаш кумылем уло манын возен колтенам.
Марий общиныштына кызыт шуко йоча уло. Нуно чыланат марла мурен-кушташ, марий пайремлашке кошташ йӧратат.
Маринан кажне тӱржӧ моткоч чаткан тӱрлымӧ. Мотор тувыр, корсет, пӧлекым пышташ мешак сынан вӱдылка, косметичке але курчак – чылажат моткоч ойыртемалтше, шинчам куандарыше.
Мариналан усталык пашаштыже у шӱлышым, у шонымаш-влакым тыланена!