Кум Сарамак гыч иктыже
Одо кундемысе Кизнер районышто кум Сарамак уло: Руш, Удмурт да Марий. Кажне ялже шкешотан. Руш Сарамакыште тамле киндым кӱэштыт, эмшудым погат, пакчасаскам куштат гын, Удмурт Сарамак тоштерже, шке историйже дене кугешнен кертеш.
Марий Сарамак кажне толшо еҥым шке юзо вийже дене пуйто вӱдылеш. Мотор пӱртӱс лоҥгаште верланыше кум уреман ялыште илыш икшырымын эрта. Еҥ-влак утларакшым мӧҥгыштак тошкыштыт, вет нунын кокла гыч шукынжо ынде сулен налме канышыш лектыныт. Икмыняр еҥ тораште огыл улшо пожарный частьыште ышта. Самырык-влак шочмо вершӧрыштым коден каяш тыршат, кугу олашке илаш куснат. Санденак ял уремыште йоча йӱк шагал йоҥга, тышеч пошкудо школыш улыжат куд икшыве гына коштеш. Туге гынат еҥ-влак ойгырен огыт шинче. Верысе клубыш погынен, нуно мурат-кушташ, ончычсо илышыштым шарналтат.
Марий Сарамак ял клубым вуйлатыше Сергей Губернаторовын мутшо почеш кызыт ансамбльыш еҥ шагалрак коштеш, туге гынат 10 ийым темыше «Сармак сем» ансамбль эше ила, да еҥ-влакым мотор муро-влак дене куандара.
Пытартыш жапыште Одо кундемыште кӱсото-влакым арален кодымо паша вияҥеш. Тыште 30 кӱсото улмо нерген палемдат. Марий Сарамак ял воктенат ожно кумалме вер лийын улмаш. Кызыт верысе калык ты шнуй верым шымлен, реестрыш пурташ шона. Одо кундемысе карт-влак тышан эсогыл изи тумо-влакымат шынден коденыт.
Марий Сарамак ял «Тӱрлӧ тӱсан Сарамак» туристический маршрутыш пура. Уна-влакым тыште команмелна дене сийлат, марла мурыктат-куштыктат, йӱла-влак дене палдарат. Кумылан-влак имне дене кудалыштын кертыт.
