Кугыжаныш йылме куш шукта?
Кызыт республикыштына 232 школ гыч 83 школышто марий йылмым шочмо йылме семын туныктат. Чылаже 8000 наре йоча. Но чумыр тунемше-влак кокла гыч тидыже 10% наре веле. «Марий» лӱмым нумалше республиклан тиде, мутат уке, моткоч шагал. Марий-влак шукын илыме районласе школлаштат утларакше марий йылмым кугыжаныш йылме семын туныктат. Лач Курыкмарий районысо школлаште гына курыкмарий йылме шочмо йылме семынак аралалтын. Моло вере школ-влак марий икшыве-влаклан шочмо йылмыштым эркын-эркын мондыктарен толыт…
Ты шотышто шукерте огыл филологий шанче кандиат, Марий образований институтысо марий филологий да культурологий кафедре вуйлтыше, Шочмо йылме дене туныктышо-влак ассоциацийын председательже Елизавета Ивановна Игнатьева дене мутланышна.
– Пеш куштылгын ме, марий ача-ава-влак, туныктышо-влак, марий йылмым кугыжаныш йылме семын тунеммашке куснышна. Марий йылмым йот йылме семын тунемше йочалан сочиненийым я почеламутым марла возаш моткоч неле. Писатель, поэт, драматург лияш йылмым келгын палыман. Икшывылан марий йылмым кугыжаныш йылме семын туныктымылан кӧра калыкнан ончыкылыкшо верч тургыжланаш логалеш…
