«ЯЛЫСЕ МАРИЙ ӰДЫР» ДЕНЕ ПАЛЫМЕ ЛИЙЫНА?
Ялыште шочын-кушшо айдемын чонжо садак ялыш шупшеш. Шочмо верыш шонымо семын лектын кошташ гына йӧн шагалрак. Но тыгай годым интернет мыланна полша. Кузе? Иктаж блогерын лаштыкышкыже пуретат, тудын илышыжым ончалат, шочмо кундемет ужат. Коклан тыгай видеом я фотом ужмеке, чон утыр ялыш шупшеш. Туге гынат тыгай сынан лаштык-влак мыланем моткоч лишыл улыт.
Пытарыш жапыште Килемар район гыч Алина Соснован Вконтакте воткылыште «Деревенская марийка» лаштыкшым ончем. Ончем гына огыл, а кугешнен эскерем! Кокланже чыла кудалтен, ялыш илаш куснымо шуэш. Тунар кумдан блогер ялысе илышын ямжым, кочкышын тутло улмыжым почын пуа…
Алина ешыж дене Ершово ялыште ила. Руслан пелашыж дене кум ӱдырым ончен-куштат. Блогер декрет канышыште гынат, паша деч посна шинчаш огеш ярсе, сурт-сомылкам вораҥдара. А паша ятыр, кеч тиде кызытсе жапыште шуэн вашлиялтеш гынат, Сосновмыт еш вольыкым ончат. Кудывечыште чыве, ик жап лудат ыле, вӱташте ушкал, презе да сӧсна-влак йӱкланат. Чыла нине вольыкым пукшаш гына мыняр жап кая, а тылеч посна кормам ямдылыман. Пакча пашат вийым йодеш. Икманаш, йокрокланаш жап йӧршын уке.
Нелылыкым ончыде, Алина чыла шукташ тырша. Чон йодмо пашамат ышта. Мутлан, тений ятыр пеледышым, мӧрым ончен куштен. Аршашым налаш йодын толшо-влакат лийыныт.
Тыгак видеом сниматлен, соцкылыш луктын шукта, мемнам, ончышо-влакым, куандара. «Видеом паша коклаште писын «монтироватлаш» да интернетыш «лукташ» ынде тунем шуынам», – воштылал ойла Алина.
– Кузе блогер сомылым шукташ тӱҥалында?
– Тӱҥалаш кеч-кунамат лӱдмашан. Мыйын гай блогер шуко уло, иктат мыйым огеш ончо, шоненам. Но тыгодым калыклан палыме лийме шуын, очыни. Сандене эркын-эркынак кечын кузе эртымыжым, тӱрлӧ ой-каҥаш видеом лаштыкыштем вераҥденам.
Уда мутым ойлышо-шамыч лийыныт да тачат улыт. Ондак чыла шке гоч тидым колтенам гын, кызыт «иммунитет» уло. Туге гынат поро, сай шомакым возышо еҥ шукырак. Тидыже поснак шерге да утыр тыршаш кумылым умбакыжат ылыжта.
– Блогер улмыда пайдам конда мо?
– Эн тӱҥжӧ мый шагалрак вожылаш тунемынам да шонымашем илышыш шыҥдарем. Тиде эн кугу пайда, шонем.
– Ешыште ты сомылым кузе акленыт? Видеошто войзалташ вигак тунем шуыныт?
– Мутат уке чылан вигак келшен огытыл. Но жап эртыме семын тунем шуыныт. Кызыт видеошто шкеныштым ужмеке, ӧрмашышт уке. Адакшым калыкат родо-влакын видеошто койылалтмыштым утларак ончат, комментарийымат возат.
– Алина, ме палена, те тыгак « Барышня – Крестьянка» телешоушто войзалтында. Ты опыт нерген палдарыза?
– Ты опыт шкешотан. Ешыште шоуш ушнаш чылан вигак келшеныт, иктымат сӧрвалаш кӱлын огыл.
Телеэкраныш логалаш мыйын шкешотан «мечтам» лийын. Тиде шонымаш шукталтдыме гай чучын. Но ик кеҥеж кечын пошкудо селаш мурызо «Дава» толын. Йолташ ӱдырем мыланем йыҥгыртен да программыш ушнаш темлен. Тыге мый шоун участницыже лийынам.
Съёмко ныл кече шуйнен. Мый Москосо кугу пӧртыштӧ иленам, а саде героиня – мемнан суртышто. Кум-ныл кече жапыште мый моткоч чот ноенам. Актёр сомылым шукташ куштылго паша огыл улмаш.
Туге гынат шонымашем илышыш шыҥдаралтын! Вес гана шарналташ, шыргыжалаш амал уло.
Тидын дене мый иктым ойлынем: шке шонымашда деч ида аптыране, тек сандалыкыш поро да сай шонымашда миен шуэш да поро дене пӧртылеш!..
«Марий ӱдыр чолга, весела да пашаче.
Марий ӱдыр шуэш кеч-кушкат…»
(Надежда Иванова).
Лач нине корныла дене тачысе материалым кошартынем. Вет Алина чынже денак моткоч чолга да пашаче. А мыняр шуктымо сомылжым, илыш опытшым тачысе материалыште ыжна тарвате. А тиде тыланда ешартыш йӧн тудын лаштыкыш пурен, кажне кечыжым эскерен, самырык ава да блогер нерген утларак пален налаш.
