Колтыдымо серыш
Автор — Мария Кожевникова
Мыняре шомак каласыде кодын, мыняре чон шокшо – пӧлеклыде, мыняре кумыл – ончыктыде… Тыланет, Авай.
Тиде кечын чон вургыжын ончем, кузе йолташем-влак аваштым пайрем дене саламлат… Кузе чот мыйынат тидым ыштымем шуэш! Ушем дене эртыше жапыш пӧртылам. Могай ме пиалан лийынна!
… Пу пӧртыштына эреак шокшо ыле, вет, авай? Каныш кечылаште коҥга гыч кӱктен лукмо когыльо пуш кызытат нерем чыгылтара. А шарнет, кузе тый пӧрт покшек шогалын, марий муро почеш лыжган кушталтет ыле. Тунам ме, кум ӱдыр-падырашет, йырет шогалын, пырля пӧрдын налына ыле. Кызытат, южо мурым колмек, лач тыйым шарналтем. Южгынам шичавӱд йӧре кушталтенат налам. Авай, а кузе тый пеледыш-влакым куанен ончен куштет ыле. Ачамже гын, пу окна янакыш пеледыш кӧршекым шындымылан моткоч сыра ыле… Но тый тудмат ласкалыкет дене савырен моштенат, сандене окнаштына эреак пеледыш пеледалтын. А мылам тый шкежат вис-вис пеледыш лийын кодынат… Яра жапыште гын кид пашамат ыштен шуктенат, мемнамат шукылан туныктенат. Авай, кызытат тыйын пидме носки ден пижергет эн шокшо улыт… Нуным арален коденам, теле йӱштӧ годым куанен чием.
Авай, кузе чот коштыргалше кидетым ниялтыме шуэш, шижат? Уло капем дене тый декет пызнен шичнем, шӱлышетым шижнем… Кеч ик татлан. Кеч. Ик. Татлан…
Авай! Могае шокшо мут, но могае йӱштӧ – шыже…
Палем, тиде серышемланат вашмутым ом нал. Шуко ынде тыгай серыш колтыде кодын: южышт телефонысо заметкеш, южышт — паша блокнотеш, южышт чонемын эн мӱндыр луктыштыжо аралалтыт.
Ава деч илыш тӱҥалеш. Сандене аралыза, йӧратыза жапыштыже. Вет кайымекышт, тетла пӧртылташ ок лий…
