Колто мыйым олыкыш, аланыш…
Эмма Ильина
***
Могай сылне пагыт, ужат, йолташем?!
Кеҥеж манме мутшак рÿпша шӱм-кылем.
Чевер кече шийым шава кумдыкеш,
Да кумыл нӧлтеш кайык муро йÿкеш.
Шинчам виктарет олык лапыш – узьмак!
Тÿням тÿзатен муралта курмызак.
Пеледыш ÿмбалне лыйгат лыве-влак,
Шкештат чылт пеледышла койыт, векат.
Могай гына тÿрлö копшаҥгым от уж?
Могай йÿк ок лек, чоҥештат тыш да туш!
Лектат пасу тÿрыш – чылт теҥыз шарлен,
Тыге кандывуй пеледеш юарлен.
Йолташ, вет могай пиалан улына:
Могай сылне верыште ме илена!
Ок кÿл мыланна шокшо эл, курыкат,
Вет шерге уке шочмо эл деч нимат!
Людмила Семёнова
***
Колто мыйым олыкыш, аланыш,
Эрык чон пӱртӱсышкӧ ӱжеш.
Налын вий-куатым, алым,
Ик жаплан ласкалык вӱдылеш.
Шӱлалтем пӱнчерын тамле южшым,
Памаш вӱд ден шӱргым чывылтем.
Шарналтен пашажым изи мӱкшын,
Чонышкем сай кумылым погем.
Тый декет толам куаныше, нойышо,
Пӱргалам мӱан пеледыш пушым.
Умылен кертат мо мыйын койышым,
Иканаште пеҥгыдым да лушым.
Сур турий деч кӱсынлем писештмым,
Тыланет кондем вашталтшым шкемым,
Порым да тыматлым, шулдыраным,
Кӧ пала пӱртӱс деч шерге эмым…
Галина Сайтаева
***
Ырыкталше кечыйолым,
Лапчык пыл кеч петыра.
Шокшо южым, кӱшыч толшым,
Юлжо дене авыра.
Шокшо, шокшо, лӱп-лӱп шокшо,
Йӱр толеш гын пеш йӧра.
Мланде, кушкыл вучен нойышт,
Вошт кошкымыштлан кӧра.
Кукуат ок шотло ийым,
Йӱдшӧ йӱштӧ шыже гай.
Мо игече дене лийын,
Ойленат ом мошто чай.
Ожсо годсо ямле жапым,
Шарналтем мый адакат.
Йӱр йымалне модмо пагыт,
Кушко шылын каенат?
Еш пырля, ӱстел коклаште,
Тамле шӱрӧ пушлана.
А шолап гыч ночко мландыш,
Йӱржӧ йӱкын шоргыкта.
Калык каналта изишак,
Шудо кеч нӧрен аҥаш.
А эрден, у вийжым шижын,
Ӱжара нӧлтеш каваш.
Нина Щербакова
Леҥежым поч
Леведе пыл марий кундемым,
Сур тӱсым налын лӱдыкта.
Вучен шуктем мо йӱр ден теммым –
Кугу корем гай под шинча.
Лупшен куржтале шыдым луктын
Кудывечыштем мардеж оргаж
Мый шонышым толешак йӱдым…
Коклан пылат шойыштеш улмаш.
Кошкен мландем, йӱктен ом теме,
Опталын, чаҥ гыч толашем…
Кава Ош Юмо, итак сыре,
Леҥежым поч, йӱктал мландем.
Алмаш, ужат, весемыт кӱлын,
Айдемыжат толеш порешт.
Да янлыкшат йӱэш шер темын,
Тылат, Юмем, ӱшан лиеш…
Эдуард Ильин
Кеҥежын сынже
Пеледышан, ужар тӱран,
Чиен эн сылне тувыржым.
А ӱпшӧ кудыр, тул тӱсан,
Шылта изишак шӱргыжым.
Шинчаже гын шарныктара
Ошалге-канде тӱтырам.
Ончалтышше шыма, тура,
Ласкалык ден лыпландара.
Кап-кылже-нарашта куэ,
Сымыстара, шылаш ок лий.
Йӱкешыже шулем уэш,
Чонем эмла — тыгае вий.
Лыжга йӱран, шонанпылан
Игече дечын улненам.
Омеш кончен улмаш мылам,
Йодаш лач лӱмжым монденам.
Шинчам кумем, шонем — омем.
Тора гыч йӱкшӧ шергылтеш:
«Йолташ, Кеҥеж, Кеҥеж лӱмем!»
Да шкеже порын шыргыжеш.
Виктория Матвеева
***
Ужарге-лай садерышке,
Чарайолан вӱдсерышке,
Шаралтыме окна гычын
Кеҥеж йӱдвошт ӱжеш.
Ок шылте шӱшпык семыште
Кузе ласка уремыште,
Кузе кӱлеш ончалтышым
Шинча ужаш йодеш.
Кеҥежын сынже – эрыште,
Мален кынелше ерыште.
Тӱня шкежат икшырымын
У толкыным налеш.
Колат, кузе куэрыште,
Эр тымык шочшо велыште,
Лышташ, шӱкалын шыгырым,
Тулйол дене модеш.
Куан – йӱран игечыште:
Нӧрет гынат тошкемыште,
Чучеш, тый пуйто угычын
Йӱреш тынеш пурет.
Кеч куржын колто, верыштак
Кеч вите, а лектеш тыге:
Йӧратыметын курткыжо
Возеш шып вачышкет.
Ална Алкече
Кеҥеж – илыш, шӱлыш, тат…
Чевер кенежым сай илем.
Ош Юмо, таум каласем.
Перкан киндем, улан илем.
Поянлык – шӱм гыч лекше сем.
Кеҥежым чон ден чоҥештем.
Кеч южгунам шуэш шортмем.
Ырес кеча гын оҥыштем,
Ласкан эрта пич йӱд омем.
Кокланже леве йӱр йӱреш.
Лӱшка мардеж: лӱм ден ӱжеш.
Ик жап гыч кече ончалеш.
Пелед, манеш, эре алешт.
Эртен мо – шошо тек лиеш.
Ю шыже ончылно иеш.
Улам. Кенежыште улам.
Пиал – тӱням ужаш мылам.
Ты пагыт – илыш, шӱлыш, тат…
Лач тат ден ӱмырым висат.
Кенеж, тылат мучаш уке…
Мыят ала чалем шуктем?
Светлана Алексеева
Эх, кеҥеж
Кечыйолжым шылтыш кече
Пыл лоҥгашке, чаманен.
Лай кеҥеж иеш мучашке –
Шокшо толкын чыгынен.
Шӧртньӧ пушыш шинчын шыже
Шукетсек вуча толмет.
Чыталта изиш, ит шыже,
Кумылет ден ит молем.
Лек пырля тӱран ер серыш –
Порсыналтын вӱд, садак
Касвелеш толам ты верыш –
Ик татлан шогал, шагат.
Шокшынрак шупшал – шарнашлан –
Тӱрвешем ал мӧр кӱмеш.
Шыжышке таҥ кыл шуяшлан,
Лийын тол куван кеҥеж.
Кайымет деч ончыч йыштак
Серышым возем чонеш.
Кеч мотор йырваш, ом шылте,
Шӱлыкан мурем шочеш…
Кече таче, шылын нерыш,
Пыл кокла гычын ыш лек.
Эх, кеҥеж, молан вес серыш,
Толкыналт вончаш вашкет?!