Чеверласа эше ик ий… (саламлымаш почеламут-влак)
Светлана Алексеева
***
Чеверласа эше ик ий,
Кода шӱм мурыжым шарнаш…
Таза, эсен, чолга тый лий!
Тыгаяк код – саска аршаш!
Салам мутем чинчан да ший,
Шушаш У ий дене, йолташ!
***
Толеш У ий, йолген ший шерла…
Пайрем ден, поро йолташем-влак!
Курант, поктен колташ полганым
Латкок гана пералте талын!
Эн сайже вел кусна у ийыш!
Лум чинче гай волгалтше илыш!
Нина Щербакова
***
Ший саламым эр юж дене,
Кумыл нӧлтын мый возем.
Тиде телын юзо вийжым
Тыланда пӧлеклынем.
Йӱштӧ вийын шыде парже,
Палена, шула садак…
Ты У ийын лыҥ йомакше —
Лийже тудо чын денак!
Галина Сайтаева
***
Йӱштӧ юж ден кылмыде,
Лум пораным ончыде,
Шӱм-чон шокшо ден ырен,
Икте-весым йӧратен,
У ийнам вашлийына.
Нигунам ок керт сеҥен
Тушманат,осалже ден.
Ме кунам чылан пырля
Ик ой дене илена —
Пиаланак лийына!
***
У ий, тений пӧлек кӱшеш
Мом йодына, кондет ала?
Тӱняште тыныслык кӱлеш,
Кеч-кӧ лач тидым тылана.
Чылаланна лийшаш куан —
Кочай, палет шкежат, шонем.
Кӱлеш лияш дыр икоян…
Мыят ты йодышыш ушнем.
Тазалыкат кӱлеш пешак,
Огеш лий тудын деч посна.
Кочан йокмаже ик мешак,
Ончаш руденак почына.
Поян пӧлеклан, ший-шӧртнян
Мешакше, ялт лу килоан!
Саламлымашше, ой, мыняр —
Чыла шукталтше вес ийлан.
Валентина Васинкина
***
У Ий дене, кажне еҥым
Шокшын-шокшын саламлем!
Сай тазалыкым, пиалым
Уло чон ден тыланем!
Людмила Семенова
***
У ий, Рошто окнаш тӱкалтышт,
Эше изиш — омсаш пурат.
Йоча чонлан — куан лӱҥгалтыш,
Пӧлекым кугужат вучат.
Кава гыч мамык лум велеш гын,
Пырля тек тыныслык возеш.
Игече пайремлан левештын,
Шӱм-кумыл йывыртен модеш.
Йолташ-влакем, куаным веле
Тек Юмо талуклан колта.
Тӱжвалне веле лийже теле —
Чонна тек илышым мокта!
Надежда Степанова
***
Марий родем-влак, саламлем!
Шуэш вашке У ий пайрем.
Ик йылме ден кутырена,
Ик вӱр ила капыштына.
Шке шокшо тыланымашем,
Чонем гыч луктын каласем.
Мый кугешнем — Марий улам!
У ий деч сӧрвален йодам:
У ий! — улат тый Юзо вий!
Вучат чылан — кугу, изи…
Йӧратыме калыкемлан,
Пиалым кондо! Кажныжлан!
Паша лиеш лек лектышан,
Пасу лиеш тек лыҥ шурнан.
Тек тӱзлана Марий Элна,
Вет тудо илыме пӧртна.
У ий ден, у вий ден тендам!!!
Лийза киндан, суртан-печан..
Мый саламлем! Мый саламлем!
Йӱштӧ коча, шуктал йодмем.
Ольга Эльтемерова
У ий дене!
Пера шагат латкок гана,
У ий мемнан — кугу уна.
Лумат велеш шыман гына,
Коча пӧлек дене шуна.
Могай куан — чылан пырля
Пайрем бокалым нӧлтена.
Лиеш чыла айват эрла,
Салютым кӱшкӧ колтена.
Пиалым кажне тылана,
Тазалык лийже манына.
Осалым чон гыч поктена,
У ийыш шыргыж вончена.
****
«У ий дене, У ий дене!» —
Йырым-йыр йоҥга салам.
«Сылне ёлко, пӧлек дене —
Чал Кочай ойлен, — Толам!»
Ю тояжын вийже ятыр,
Тыныс кечым тек сакла.
Лийже кажне эрге патыр,
Сай-осалым чын акла…
Кажне суртыш у пиалым,
Еш куаным тек конда.
Ойгыш шып пышта ош шальым,
Ший оксам тичак кода.
Кожын имыж наре шуко
Тек шочеш марий йоча.
Кеч вургемна тӱрлӧ уло,
Тукым вожнан — ик коча.
Ынже лий тӱняште йорло,
Лийже кажне еш поян.
Родо-тукым ынже торло,
Илыже калык икоян.
У ий дене, У ий дене!
Шоктыш йӱк латкок гана.
Муро да гармонь йӱк дене
Таче калык тек кана.
Ална Алкече
***
Салам, У ий.
Пеш поро лий.
Кондаш перкем
Чыла вере
Шнуй киндылан:
Тудлан, мылам…
Айдемылан ма,
Тырлыклан
Поч у кавам.
Вуча авам…
Тек Сар чарна.
Тушман ярна.
Эдуард Ильин
***
У ий кастен, пелйӱд вашеш,
Чӱктем сортам ӱстелтӧреш.
Тӱргоч лиймеш темем коркам,
Шке шолтымо ушмен пурам.
Ом мондо Юмым пелешташ,
Эрталше ийлан таушташ.
Ешем да родо-тукымем
У ий пайрем ден саламлем.
Эн пеҥгыде тазалыкым,
Пиал ден чон ласкалыкым,
Йӧратымаш лач лийже эм —
Чыла эн сайым тыланем.
Пура коркам нӧлтал колтем,
Шокталте гармонет, родем!
Кож йыр шогалын мурена,
Мурсем почеш кушталтена.
Виктория Матвеева
***
Телын уло юзо вийже!
Шижыда, кузе пӧрдеш
Лум коклаште, уремлаште,
Пӧртышкат пураш муэш?
У ий кумыл толжо, лийже!
Ӱшандарыше уэш.
Тӱкалта тетла окнашке —
Кажне дек пиал толеш.
Илышнан эн шерге сийже —
Йӧраташ, кават ӱжеш,
Кеч ты татыште, эрлаште.
Сӧрасаш чонна йодеш.
Алёна Яковлева
***
А жап канышашым ок пале,
Шотла тат пӧрдемым шагат –
У ийым вашлийза ӧндалын!
Лиеш тудо поро, ракат,
Куан дене темше, суапле!
Ласкалыкым чон вашлиеш!
Лиеш тек у пагыт тыматле,
Мемнам чаманалше лиеш…
Колеш чон йӱкнам Ош сандалык,
Ӱшан тулым йӱштӧ ок нал.
Вашлийза У ийым ӧндалын –
Тендам ӧндалеш у пиал!
Ольга Антропова
***
У ий толеш, у вий лиеш,
Чыла осал шенгек кодеш.
Конда пиалым шондыкеш,
Тазалыкым — кугу лачеш.
Каналтыза пайрем кастен,
Куаныза у илыш верч.
Ты юзо вий чыла кертеш,
Чыла, шонет мом, шукталтеш.
Людмила Соколова
***
У ий койын лишемеш,
Шӱм-чоннаже вургыжеш…
Кумылнаже нӧлталтеш,
Ю куан ден рӱпшалтеш.
У ий дене саламлем,
У пиалым тыланем.
Чон ласкалыкым, куаным
Кажнылан мый сугыньлем.
Ваш келшал илаш ӱжам,
Йӧратен да пагален.
Икте-весылан полшал,
Илышлан лач куанен.
Кож йыр пӧрдын савырнал,
Йоча жапым шарналтен.
Тыланет У ий сӧрал
У пӧлекым ямдылен.
Курант йӱкеш нӧлтен бокалым,
Тек порылык озалана!
Кунам пырля — ӱстел йырак.
У ий толеш, Драконын ийже,
Ура!
Вера Гордеева
***
Йомакысе юзо тек толжо кечеш.
Ю шӱлыш, пӧлек дене темыже йӱдым.
Торасе — лишемже, осал гын — поремже.
Айдеме йӧратыме шичше тек кӱдынь.
Тек йӧндымӧ корно ӱшан ден темеш.
У ий. Кажнын чонышто у шонымаш.
Эрласым вучен, иктешлалте «теҥгече».
Пашалан — у шӱлыш, а лӱдшӧ — вияҥже.
Пошкудо пий йӱк ынже покто шеҥгечын.
Тек ситыже вий да куат чын илаш.
Ольга Леухина
***
Ош лум пырчым копашке шылтем шыматен,
Лачак ик шонымашым У ийлан йоднем.
Латкандаш ияш пагытыш пӧртыл, жапем,
Илыш-корным вес шӱртӧ ден угыч тӱрлем.
Анна Андреева
***
Йӱштӧ теле окналаште сӱрет-влакым сӱретла,
Йӱштӧ Кугыза пӧлекым йоча-влаклан ямдыла.
У куаным, шыргыжмашым калык-влаклан тылана,
У пиал ден кажне пӧртыш лач пелйӱдлан тӱкалта.
Саламлаш вашка пӧлек ден, поро ойым ямдыла,
Йоча-влакын шонымашым тудо тыманмеш шукта.
Дарья Дудина
***
У Ий вашеш мый тыланда
Кавам эн кандым тыланем.
Тек рвезе-шамыч сурт еда
Авашт дек портылыт вашкен.
Тек кажне икшыве тӱнян
Таза да пиалан лиеш.
Сорта гай кӱчык ӱмырна
Тек кече гае волгалтеш!
