Кавказ курык вийым пуа
Автор-Виктория Матвеева
Кузе калыкыште ойлат, телылан издерым, я терым кеҥежымак ямдылыман. Издерым огыл, ечым манам гын?.. Нине самырык еҥ-влакын ечышт лум толмым вучен, канат гын, ечызе-шамыч кеҥеж тургымым яра шинчен огыт эртаре. Мутлан, тиде тенийлан ынде нылымше тренировочный погынымаш (сбор). Тылеч ончыч Яльчикыште (Марий Эл) да Сыктывкарыште (Коми) лийыныт гын, кызыт ечызе-влак Кавказ курыкышто Приэльбрусье кундемыште ямдылалтыт.
Палыме лийза – ече дене Марий Эл командын участникше-влак!
Шола гыч пурлашке: Арутюнян Тигран, Станислав Егоров, Кошкин Константин, Избанов Алексей, Арбузов Родион, Соловьева Ирина, Важенин Роман, Кушков Вячеслав.
Тиде погынымаш нерген шке шонымашыжым Станислав Егоров почын пуа:
– Тыште ме 20 август гыч 2 сентябрь марте лийына. Мый тыгай курыкан верыште икымше гана ямдылалтам. Чыным ойлаш гын, тыште вес нагрузка шижалтеш. Толмо почеш кап-кыллан нелырак ыле: вуйпӧрдмӧ, шӱм чотрак кӱлткымӧ шижалтын, шӱлашат нелырак лийын. Кызыт ынде тунемалтын. Мемнан тренерна – Кошкин Николай Анатольевич, мыланна кечеш кок тренировкым эртара. Ончыч ме вич шагат эрдене трассыште лыжероллер дене «конёк» дене коштына. Вес тренировко годым машина дене 25 меҥгым ӱлыкӧ корно почеш волена, варажым мӧҥгеш тыгакак лыжероллер дене «классика» манме дене кӱзена. Шижалтеш, 850 метр кӱкшыт ойыртем нелылыкым пуа. Тылеч посна ме команда дене кросс-походыш коштына. Тидыже утларак келша, вет тыште пӱртӱс ойыртемалтше, мотор.
Каласыман, тиде сбор деч вара мемнан ечызе-влак сентябрь тылзыште лыжероллер дене Российын ЧемпионатышкыжеТюменьыш каят. Тазалыкым да сеҥымашым нунылан тыланена!
